Эрон Яқин Шарқдаги АҚШ ҳарбий позицияларига жавоб зарбасини берди
Ҳужумлар ракеталар ва дронлар ёрдамида амалга оширилган.
Эрон Яқин Шарқдаги АҚШ ҳарбий позицияларига қарши жавоб зарбаларини амалга оширди. Бу ҳақда “Fars” ахборот агентлиги Теlegram каналида маълум қилди.
Агентлик маълумотига кўра, ҳужумлар ракеталар ва учувчисиз учиш аппаратлари ёрдамида амалга оширилган.
Эрон Қуролли Кучлари Бош штаби АҚШнинг мамлакат жанубидаги Систон ва Балужистон ҳамда Ҳормозгон вилоятларидаги нишонларга берган зарбаларига жавобан Эрон Қуролли Кучлари АҚШга қарши жавоб чораларини кўраётганини билдирган.
Аввалроқ АҚШ ҳарбийлари Эроннинг жанубий ҳудудларидаги нишонларга, жумладан, Ҳормуз бўғози ҳудудидаги объектларга зарбалар бергани ҳақида хабарлар тарқалган эди. Шунингдек, АҚШ кучлари Ларак оролидаги Эрон ракета учириш қурилмаларига ҳужум қилгани маълум қилинган.
АҚШ Марказий қўмондонлиги (СENТСОМ) ҳам Эрондаги қатор нишонларга зарбалар берилганини билдирган. Эроннинг жанубий қирғоқлари, жумладан, Қешм ороли ва айрим қирғоқбўйи ҳудудларида портлашлар содир бўлгани ҳақида хабар берилган.
АҚШ президенти Доналд Трамп аввалроқ Америка нишонларига қарши янги ҳужумлар уюштирилган тақдирда Эронга қарши кескин чоралар кўрилиши ҳақида огоҳлантирган эди.
