"Россия осмони бутунлай хавфли бўлиб бормоқда" — Зеленский
Украина президенти Россия ҳаво ҳудудидан фойдаланаётган авиакомпанияларни дрон ҳужумлари сабаб хавф кучаяётганидан огоҳлантирди.
Владимир Зеленский Россия ҳаво ҳудудидан фойдаланаётган авиакомпаниялар, суғурта компаниялари ва хорижий давлатларни парвозлар хавфсизлиги билан боғлиқ хатарлар кучаяётганидан огоҳлантирди.
Зеленский 1 сентябрь куни кечки видеомурожаатида Россия томонидан Украинага қарши бошланган уруш оқибатлари мамлакат ҳудудидан ташқарига ҳам таъсир қилаётганини таъкидлаган. Унинг сўзларига кўра, Украинанинг узоқ масофали дрон операциялари кенгайиб бориши сабаб Россия ҳаво ҳудудидан фойдаланиш тобора хавфли тус олмоқда.
“Россия ҳаво ҳудуди амалда ёпилади; Россия бошлаган уруш унинг осмонини ёпмоқда”, — деган Украина президенти.
Зеленский Украина фуқаролик авиациясига таҳдид солмаслигини, бироқ Россия ҳаво ҳудудида дронлар сони ва кўламини ҳисобга олиш зарурлигини билдирган. У Россиянинг Москва, Санкт-Петербург ва бошқа йирик шаҳарлардаги аэропортларига парвозларни амалга ошираётган авиакомпанияларни вазиятга жиддий эътибор қаратишга чақирган.
Украина президенти, шунингдек, Россия осмонида “хавфсиз даврлар тугаганини” таъкидлаб, мамлакатдаги ва Москвадаги хорижий дипломатик ваколатхоналарни ушбу маълумотни ўз ҳукуматларига етказишга чақирган.
Унинг маълум қилишича, Украина Ташқи ишлар вазирлиги ва бошқа тегишли идоралар Россия ҳаво ҳудудидаги хавфлар бўйича халқаро ташкилотларга маълумот тақдим этади.
Зеленский Украина узоқ масофали дронлар ёрдамида Россиянинг ҳарбий инфратузилмаси ва урушни қўллаб-қувватлаётган объектларига зарбалар бериш сиёсатини давом эттиришини билдирган.
Украина ҳаво ҳудуди эса Россиянинг кенг кўламли босқини бошланган 2022 йил 24 февралидан буён фуқаролик авиацияси учун ёпиқ.
