Россияда меҳнат мигрантлари учун тиббий кўрик қоидалари кучайтирилди
Энди 30 кундан ортиқ қолувчилар ҳар йили тиббий кўрикдан ўтиши шарт.
Россияда 1 сентябрдан бошлаб меҳнат мигрантларининг тиббий кўрикдан ўтиш тартибига оид янги талаблар кучга кирди.
ТАСС маълумотига кўра, аввал Россияга кирган мигрантлар хавфли юқумли касалликлар, ОИВ инфекцияси ва гиёҳванд моддаларни истеъмол қилиш ҳолатини аниқлаш мақсадида 90 кун ичида тиббий кўрикдан ўтиши керак эди. Эндиликда ушбу муддат 30 кунгача қисқартирилди.
Шунингдек, Россияга 30 кундан ортиқ муддатга келган мигрантлар ҳар йили тиббий кўрикдан ўтиши шарт. Текширув билан боғлиқ харажатлар мигрантнинг ўзи ёки иш берувчи томонидан қопланади.
Янги тартибга кўра, мигрантларни тиббий кўрикдан ўтказишда воситачилар иштирокига йўл қўйилмайди. Текширувлар фақат ваколатли тиббиёт ташкилотлари томонидан амалга оширилади.
Тиббий кўрик вақтинчалик яшаш ёки ишлаш учун рухсатнома олиш, шунингдек, патентни узайтириш учун ҳам мажбурий талаб ҳисобланади.
Текширув якунлари бўйича тиббий хулоса, жумладан, электрон шаклда расмийлаштирилади ва тегишли маълумотлар Ягона давлат соғлиқни сақлаш ахборот тизимига киритилади.
Агар мигрантда хавфли юқумли касаллик, ОИВ инфекцияси ёки гиёҳванд моддаларни истеъмол қилиш ҳолати аниқланса, тиббиёт ташкилотлари бу ҳақда 24 соат ичида Россия Ички ишлар вазирлиги ва Роспотребнадзорга хабар бериши лозим.
