Си Цзиньпин Яқин Шарқда янги хавфсизлик тизимини яратишга чақирди
Си Цзиньпин Миср президенти Абдулфаттоҳ ас-Сиси билан учрашувда минтақа давлатлари ўз тақдирини ўзи белгилаши кераклигини таъкидлади.
Хитой раиси Си Цзиньпин Мисрга ташрифи чоғида Яқин Шарқ давлатларини ташқи аралашувга қарши туриш ва минтақада янги хавфсизлик тизимини шакллантириш имкониятларини кўриб чиқишга чақирди.
Си Цзиньпиннинг таъкидлашича, Хитой минтақа давлатлари билан биргаликда денгиз йўллари хавфсизлигини таъминлашга тайёр. У бу масала Ҳормуз бўғози ва Боб ал-Мандаб орқали кемалар қатнови можаролар сабаб издан чиққани ортидан янада долзарб бўлганини қайд этди.
Миср президенти Абдулфаттоҳ ас-Сиси билан учрашувда томонлар хавфсизлик ва терроризмга қарши кураш соҳаларидаги ҳамкорликни кучайтиришга келишиб олди. Шунингдек, маълумотлар марказлари, яримўтказгичлар ва муҳим металлар етказиб бериш занжирлари бўйича ҳамкорликни кенгайтириш масалалари муҳокама қилинди.
Миср сўнгги йилларда АҚШ билан мудофаа соҳасидаги яқин алоқаларини сақлаб қолган ҳолда, Хитой билан иқтисодий ва ҳарбий ҳамкорликни ҳам фаол ривожлантирмоқда. Пекин эса Мисрнинг стратегик жойлашуви ва минтақадаги таъсиридан фойдаланиб, Яқин Шарқдаги ролини кучайтиришга интилмоқда.
