“Ёлғон гапириш айрим эронликлар учун динининг бир қисми” – АҚШ Вакиллар палатаси спикери
Спикер Трампнинг Эронга қарши уруш бошлаш қарорини ҳимоя қилиб, Теҳрон билан музокараларда ишонч йўқлигини айтди.
АҚШ Вакиллар палатаси спикери Майк Жонсон журналистлар билан суҳбатда Доналд Трамп маъмуриятининг Эронга нисбатан сиёсати ва февраль ойида бошланган уруш ҳақида гапирган. У АҚШ президенти вазиятни “барқарор қўлларда” бошқараётганини айтган. Бу ҳақда Al Jazeera хабар берди.
Спикер АҚШнинг Эрон билан музокаралардаги асосий муаммоларидан бири сифатида Теҳронга ишониб бўлмаслигини кўрсатган.
“Муаммо шундаки, эронликларга шунчаки ишониб бўлмайди. Улар музокара столига ўтириб, бир нарсани айтишади, кейин эса кетиб, бунинг аксини қилишади”, деган Жонсон.
Шундан сўнг у айрим эронликларнинг диний қарашлари ҳақида гапирган. “Улар бизни Буюк Шайтон деб билишади ва уларнинг нотўғри диний қарашларида бизни йўқ қилиш истаги бор. Уларни муросага келтиришнинг иложи йўқ”, деган спикер.
Жонсон, шунингдек, Эрон режими АҚШ президентларининг олдинги сиёсатига зид равишда ядровий қурол яратиш имкониятларини излаб келганини айтган ва бу орқали Теҳроннинг “мафкураси ва ақидапарастлигини охиригача етказиш”га интилаётганини билдирган.
Спикер яна Эронга қарши урушни зарур чора сифатида ҳимоя қилган. Трамп маъмурияти ва унинг иттифоқчилари ҳарбий амалиётларни Теҳрон томонидан юзага келган “яқинлашиб келаётган” ядровий таҳдидни бартараф этиш зарурати билан изоҳлаб келган.
