Зафарабод тумани ҳокими ва унинг ўғли ЙТҲга учради
“MAZ” русумли юк машинаси чапга бурилиш вақтида қарама-қарши йўналишда ҳаракатланаётган ҳоким бошқарувидаги “KIA Seltos” билан тўқнашган.
Жорий йилнинг 30 август куни соат 07:45 ларда Жиззах вилояти Зафарабод тумани Нурафшон МФЙ ҳудудидан ўтувчи 25В-037 автомобиль йўлининг 7-километрида йўл-транспорт ҳодисаси содир бўлди.
Туман ҳокимлиги ахборот хизмати маълумотларига кўра, «MAZ» русумли юк автомашинасини бошқариб келаётган Б. Мўминов чап томонга бурилиш вақтида қарама-қарши йўналишда ҳаракатланаётган Зафарабод тумани ҳокими Ғ. Эшпўлатов бошқарувидаги «KIA Seltos» русумли хизмат автомобилининг ҳаракатланиш йўлига чиқиб кетган.
Натижада транспорт воситалари тўқнашган.
ЙТҲ оқибатида Зафарабод тумани ҳокими Ғ. Эшпўлатов ҳамда автомобилда йўловчи бўлган унинг вояга етмаган ўғли Ш. Эшпўлатов турли даражадаги тан жароҳатлари билан Республика шошилинч тиббий ёрдам илмий маркази Жиззах филиалининг жонлантириш бўлимига ётқизилган.
«MAZ» ҳайдовчиси Б. Мўминов тан жароҳати олмаган.
Мазкур ҳолат юзасидан 30 август куни Зафарабод туман прокуратураси томонидан Жиноят кодексининг 266-моддаси 1-қисми билан жиноят иши қўзғатилган.
Ҳозирда ҳолат юзасидан дастлабки тергов ҳаракатлари олиб борилмоқда.
