Ҳар бешинчи бола интернетда жинсий зўравонлик ёки эксплуатацияга учраган — UNICEF
Болалар ҳуқуқларини ҳимоя қилиш халқаро ташкилоти 21 мамлакатдаги тадқиқот асосида бир йил давомида 12–17 ёшли қарийб 20 миллион бола интернет орқали жинсий зўравонлик ёки эксплуатациянинг камида бир турига дуч келганини маълум қилди.
UNICEF ҳисоботига кўра, ўрганилган мамлакатларда 12–17 ёшли интернет фойдаланувчи болаларнинг қарийб ҳар бешинчиси технологиялар орқали жинсий зўравонлик ёки эксплуатацияга учраган. Тадқиқот 2020–2025 йилларда 21 мамлакатда ўтказилган сўровлар ва қарийб 21 минг нафар бола ҳақидаги маълумотларга асосланган.
Ҳисоботда 15 миллиондан ортиқ бола исталмаган жинсий мазмундаги контентга дуч келгани, қарийб 9 миллион бола эса ўз хоҳишига қарши жинсий суҳбатларга киришишга ёки жинсий тасвирларни юборишга мажбурлангани қайд этилган. Яна 4 миллион боланинг жинсий тасвирлари розилигисиз тарқатилган.
Бундай ҳолатларнинг қарийб 60 фоизи ижтимоий тармоқларда содир бўлган. Энг кўп тилга олинган платформалар орасида Facebook, WhatsApp, Instagram, Snapchat ва TikTok бор. Ҳолатларнинг яна 14 фоизи онлайн ўйинлар билан боғлиқ бўлган.
Тадқиқот сунъий интеллект билан боғлиқ янги хавфни ҳам кўрсатган. Маълумот тўпланган тўққиз мамлакатда тахминан 1,1 миллион бола ўзининг тасвири асосида сунъий интеллект ёрдамида жинсий мазмундаги сохта расм ёки видеолар яратилганини билдирган.
Муаммо кўламини аниқлашни қийинлаштираётган омиллардан бири жабрланганларнинг жуда кам қисми ёрдам сўраганидир. Тадқиқотга кўра, ҳолатларнинг 1 фоизидан ҳам ками полиция, ижтимоий ходим ёки ишонч телефонларига хабар қилинган. UNICEF ҳукуматлар ва технологик компанияларни болаларни ҳимоя қилиш чораларини кучайтириш, қонунчиликни сунъий интеллект орқали яратиладиган жинсий контент каби янги таҳдидларга мослаштириш ва хабар бериш тизимларини яхшилашга чақирган.
