Барча маҳаллаларда ишига нолойиқ ҳоким ёрдамчилари янгиланади
8 992 та маҳалладаги ҳоким ёрдамчилари “лойиҳабай” ишлаш тизимига ўтказилади.
Кредит тарихида кечикишлари бўлган эҳтиёжманд аҳолининг лойиҳаларини ҳам индивидуал баҳолаш асосида имтиёзли молиялаштириш имконияти яратилади.
Шунингдек, Камбағаллик жамғармасидаги 240 миллиард сўм, Бандлик жамғармасидаги 100 миллиард сўм ҳамда учта «дафтар»даги 760 миллиард сўм маблағ туман штаблари ихтиёрига берилади.
Эндиликда туман штаблари субсидия ёки фоизсиз ссуда ажратиш масаласини ҳам мустақил ҳал қилади. Тадбиркорлик компаниясининг компенсациялар учун йил якунига қадар назарда тутилган 300 миллиард сўмлик қолдиғи ҳам штаблар орқали ажратилади.
Шу тариқа туманлар ихтиёрига жами 3 триллион 200 миллиард сўм ресурс йўналтирилади. Бунда ажратилган маблағларнинг аниқ натижа беришига алоҳида эътибор қаратилади.
Шунингдек, кредит, субсидия ва компенсация шартларини фармон ва қарорлар билан белгилаш амалиётидан воз кечилади. Иқтисодиёт вазирлиги ва Марказий банк ҳудудларнинг салоҳиятидан келиб чиқиб, молиялаштириш механизмларини ҳар чоракда янгилаб боради.
Туман штаблари маҳаллалардаги ҳоким ёрдамчиларини «лойиҳабай» ишлаш тизимига ўтказади. Бунинг учун 8 минг 992 та маҳалладаги ҳоким ёрдамчилари вазифа бажарувчи этиб тайинланади.
Фидойи ва ташаббускор кадрлар лавозимига қайта тайинланади, ўз вазифасини лозим даражада бажара олмаётган ходимлар эса янгиланади.
