Глинка кўчасида асфальт ўпирилди
Ҳодиса сабаблари ўрганилиб, унинг оқибатларини бартараф этиш ишлари олиб борилмоқда.
Тошкент шаҳри Яккасарой туманидаги Глинка кўчасида ер ости қувурининг ёрилиши оқибатида йўл қопламасининг бир қисми шикастланди. Ҳодиса натижасида айрим транспорт воситаларига зарар етган.
Воқеа жойига “Veolia Energy”нинг авария-тиклаш бригадаси ва мутахассислари зудлик билан етиб бориб, зарур чораларни кўришни бошлаган.
Айни пайтда ҳодисанинг келиб чиқиш сабаблари ва ўпирилиш тафсилотлари тегишли мутасадди ташкилотлар ҳамда соҳа мутахассислари томонидан ўрганилмоқда. Шунингдек, ҳодиса оқибатларини бартараф этиш ва шикастланган йўл қисмини тиклаш ишлари олиб борилмоқда.
Мазкур ҳолат ҳокимлик томонидан алоҳида назоратга олинган. Жалб этилган хизматлар фаолияти мувофиқлаштирилиб, ҳудудда фуқаролар хавфсизлигини таъминлаш ва юзага келиши мумкин бўлган ноқулайликларни камайтириш бўйича зарур чоралар кўрилмоқда.
Ҳозирда Глинка кўчасида транспорт воситалари ҳаракати вақтинча тўхтатилган. Ҳайдовчилардан йўналишларини режалаштиришда мазкур чекловни инобатга олиш сўралмоқда.
Текширилган, тасдиқланган маълумотлар асосида вазият ҳамда олиб борилаётган ишлар ҳақида қўшимча ахборот бериб борилади.
