Хоразмда 81 минг нафар камбағал аҳолининг ҳолати ўрганилди
Хоразмдаги камбағал оилаларда 48 минг нафар бола борлиги аниқланиб, улар учун қўшимча тўгараклар ташкил этиш вазифаси белгиланди.
Президент топшириғига кўра, иқтисодий комплекснинг барча раҳбарлари Хоразмда қолиб, камбағаллик билан ишлаш тизимини ўзгартириш бўйича таҳлил ўтказди.
Икки ҳафта давомида вилоятдаги 81 минг нафар камбағал аҳоли, яъни 19 минг оиланинг ҳолати ўрганилди. Ушбу оилаларда 12 минг нафар ишсиз ва 10 минг нафар даромади паст фуқаро борлиги аниқланди.
Айни пайтда Хоразмдаги тадбиркорлар қурилиш соҳасига 4 минг, хизматлар соҳасига 3 минг ва саноатга 2,5 минг ишчи излаётгани қайд этилди.
Масъулларга ишсиз ва кам даромадли аҳолини корхоналар эҳтиёжидан келиб чиқиб касбга ўқитиш ҳамда иш билан таъминлаш имкониятларини тўлиқ ишга солиш вазифаси қўйилди. Мавжуд бўш иш ўринлари ва касбга тайёрлаш имкониятларидан фойдаланиш орқали камбағал оилалардаги 10–15 минг нафар фуқаронинг даромадини ошириш мумкинлиги таъкидланди.
Ўрганишлар давомида камбағал оилаларда 48 минг нафар бола борлиги аниқланган. Бироқ уларнинг келажакдаги бандлигини таъминлаш, алоҳида шуғулланиш ва ҳозирданоқ касб-ҳунарга жалб этиш бўйича махсус дастур мавжуд эмаслиги қайд этилди.
Вилоятнинг ҳар бир туманида камида 1–2 тадан техникум ва 4–5 тадан ўқув маркази фаолият юритаётгани кўрсатиб ўтилди. Ёшлар етакчилари, ҳоким ёрдамчилари ва хотин-қизлар фаолларига мактаб, техникум ва ўқув марказларида камбағал оилалар фарзандлари учун қўшимча тўгараклар ташкил этиш вазифаси белгиланди.
Шунингдек, Хоразмда камбағал оилалардаги 10 мингдан зиёд аёл бола парвариши билан банд экани қайд этилди. Бундай оилалар фарзандларининг боғча қамрови 75 фоизга ҳам етмаслиги кўрсатиб ўтилди.
Ҳудуддаги янги лойиҳалардан келиб чиқиб, 646 нафар коллеж ўқувчиси ва олийгоҳ талабасининг дуал таълим асосида касбий кўникмаларини ошириш имконияти борлиги таъкидланди.
Бундан ташқари, камбағал оилалардаги пенсия ёшидаги ва ногиронлиги бўлган 526 нафар инсонга ижтимоий ёрдамни кучайтириш орқали уларни парвариш қилаётган оила аъзоларига даромадли меҳнат билан шуғулланиш имкониятини яратиш мумкинлиги қайд этилди.
