Ишлайдиган оналарга фарзанди бир ёшга тўлгунча нафақа тўланади
Эҳтиёжманд аҳолини ижтимоий реестрга киритишда даромад билан бирга ногиронлик, кўп болалилик, сурункали касаллик ва бошқа омилларни ҳисобга олувчи янги тизим жорий этилади.
Шавкат Мирзиёев раислигида камбағалликни қисқартириш ва аҳоли даромадларини ошириш бўйича ишларни янги босқичга олиб чиқиш масалаларига бағишланган йиғилишда эҳтиёжманд оилаларнинг ижтимоий ҳимоясини кучайтириш бўйича янги ёндашувлар белгиланди.
Ижтимоий ҳимоя миллий агентлигига йил якунига қадар эҳтиёжманд аҳолини “Ижтимоий реестр”га киритиш тизимини қайта кўриб чиқиш топширилди. Бунда фуқароларнинг даромади билан бирга сурункали касаллик, ногиронлик, кўп болалилик ва оила аъзосининг хорижда ишлаётгани каби омилларни ҳисобга олувчи кўп ўлчовли баҳолаш тизимига ўтилади.
Республикада камбағаллик даражаси 3,9 фоизга тушган бўлса-да, 3 ёшгача фарзанди бор оилаларда бу кўрсаткич ўртача 6,5 фоизни ташкил этаётгани қайд этилди.
Шу муносабат билан бола парвариши билан банд ота-оналарни уйида ёки маҳаллада ишли ва даромадли қилишга қаратилган тизим йўлга қўйилади. Ишлайдиган оналарга фарзанди бир ёшга тўлгунига қадар Ижтимоий суғурта жамғармасидан нафақа тўланади.
Меҳнатга лаёқатсиз эҳтиёжманд оилаларга “пассив даромад” келтирадиган ижтимоий пакет учун жорий йилда 300 миллиард сўм ажратилган. Ушбу ёрдамдан фойдаланган 11 минг оиланинг ярмида даромад сезиларли ошгани қайд этилди. Мазкур тизимни давом эттириш бўйича қарор лойиҳасини бир ҳафта муддатда киритиш топширилди.
Келаси йилдан “Ижтимоий реестр”га киритилган оилалар фарзандларининг давлат ва хусусий боғча бадали, ўқув маркази тўлови, йўлкираси ҳамда олийгоҳдаги ётоқхона харажатлари ваучер орқали қоплаб берилади.
Ваучер 12 ой муддатга берилади ва эҳтиёжманд оила “Ижтимоий реестр”дан чиқарилганидан кейин ҳам амал қилади.
