Истанбулда омбор ёнди: қуюқ тутун шаҳар осмонини қоплади

Ёнғин бугун эрталаб, тахминан соат 10:30 да номаълум сабаб билан бошланган. Қисқа вақт ичида кучайган аланга омборни тўлиқ қамраб олган. Омборда кимёвий моддалар ҳамда автомобиль эҳтиёт қисмлари сақлангани хабар қилинди.

 

Ёнғин натижасида осмонни қуюқ қора тутун қоплаган. Тутун Истанбулнинг бир қатор ҳудудларидан ҳам кўринган. Омборда кимёвий моддалар бўлгани сабабли ёнғин вақтида бир неча марта кичик портлашларга ўхшаш овозлар эшитилган.

 

Кучли шамол ҳам вазиятни мураккаблаштирган. Айрим хабарларга кўра, ҳудудда шамол тезлиги соатига 40–50 километрга етган. Шу сабабли аланга омбор ёнидаги ёғоч материаллар сақланадиган омборга, бошқа бир ишлаб чиқариш корхонасига ва дарахтзор ҳудудга ҳам ўтган.

 

Хабар олиниши билан воқеа жойига полиция, тиббий ёрдам ходимлари ва 10 та тумандан кўплаб ёнғин-қутқарув экипажлари жалб этилган. Ўт ўчириш ишларида махсус техника, кўпик ва сув минораларидан фойдаланилган. Полиция эса ҳудудга олиб борувчи айрим йўлларни ёпиб, хавфсизлик чораларини кучайтирган.

 

Аланга аҳоли яшайдиган ҳудудларга яқинлашгани сабабли атрофдаги айрим биноларда бўлган фуқаролар хавфсизлик нуқтаи назаридан вақтинча эвакуация қилинган. Кейинчалик ёнғиннинг асосий қисми назоратга олингач, хавф ҳам камайган.

 

Қутқарувчиларнинг тахминан уч ярим соатлик саъй-ҳаракатларидан сўнг ёнғин назоратга олиниб, тўлиқ ўчирилган. Дастлабки маълумотларга кўра, ҳодиса оқибатида ҳалок бўлганлар ёки жароҳатланганлар қайд этилмаган. Ёнғин натижасида логистика омбори жиддий зарар кўрган ва фойдаланишга яроқсиз ҳолга келган. Ҳозирда ҳудудда совитиш ишлари олиб борилмоқда.

 

Ёнғиннинг келиб чиқиш сабаби ҳозирча аниқ эмас. Ҳодиса юзасидан текширув бошланган.