Оилавий ва ёшлар тадбиркорлиги кредитларини бошқариш ваколати туман штабларига берилади

 

Шавкат Мирзиёев раислигида камбағалликни қисқартириш ва аҳоли даромадларини ошириш бўйича ишларни янги босқичга олиб чиқиш масалаларига бағишланган йиғилишда маҳалла банкирлари ва ҳоким ёрдамчиларининг лойиҳалар билан ишлаш кўникмалари танқидий баҳоланди.

 

Уларнинг аксарияти кимга кредит кераклиги, қайси лойиҳани лизинг, факторинг, кафолат, суғурта, айланма маблағ ёки шартнома асосида молиялаштириш мумкинлигини етарлича тушунмаслиги қайд этилди.

 

Банкирлар ва ҳоким ёрдамчиларининг лойиҳа тайёрлашдан олдин ҳамон “Гарови борми?” деган саволни қўяётгани танқид қилинди.

 

Шунингдек, тадбиркорларга кредит ажратишда бюрократик тўсиқлар сақланиб қолаётгани, кредитларни қайтариш графиклари эса бизнес йўналишларига мослаштирилмаётгани кўрсатиб ўтилди.

 

Кредитларни қайтариш муддатларини деҳқончилик, савдо ва бошқа бизнес йўналишларининг ўзига хос хусусиятларидан келиб чиқиб белгилаш зарурлиги таъкидланди.

 

Оилавий ва ёшлар тадбиркорлиги учун имтиёзли кредит ресурсларини бошқариш ваколати туман штабларига ўтказилиши белгиланди.

 

Эндиликда туман штаблари кимга қанча кредит бериш, маблағни нақд ёки нақдсиз шаклда ажратиш, қайтариш муддатини узайтириш ҳамда тўлов графигини бизнес турига мослаштириш масалаларини мустақил ҳал қилади.

 

Шунингдек, инклюзив молиялаштириш масалалари ҳам туман штаблари ваколатига ўтказилади.

 

Ҳозир оилавий тадбиркорлик учун 1 триллион 370 миллиард сўм, ёшлар тадбиркорлиги учун эса 450 миллиард сўм кредит ресурслари мавжуд.

 

Туман штабларига маҳаллий шароит ва лойиҳаларнинг самарадорлигидан келиб чиқиб, молиялаштириш масалаларини мустақил ҳал этиш имконияти берилади.

 

Бундан ташқари, лидер тадбиркор 10 та оила билан кооперация қилса, 500 миллион сўмгача, 100 та оила билан ҳамкорликни йўлга қўйса, 5 миллиард сўмгача гаровсиз кредит олиши мумкин бўлади.