Ҳокимлар ҳафтада уч кун фақат камбағаллик ва бандлик масалалари билан шуғулланади
Ҳар бир вилоят ва туманда камбағалликни қисқартириш бўйича штаблар тузилади.
Шавкат Мирзиёев раислигида камбағалликни қисқартириш ва аҳоли даромадларини ошириш бўйича ишларни янги босқичга олиб чиқиш масалаларига бағишланган йиғилишдa Хоразм мисолида ўтказилган таҳлиллар барча вилоятларга тааллуқли экани қайд этилиб, камбағаллик билан ишлаш бўйича мутлақо янги тизим жорий этилиши белгиланди.
Янги тизимга мувофиқ, “маҳалла еттилиги” учун масъул раҳбарлар, вилоят ва туман ҳокимлари ҳамда банклар кучайтирилган иш режимига ўтади.
Ҳар бир вилоят ва туманда ҳоким бошчилигида штаблар ташкил этилади. Банклар ва бандликка кўмаклашиш идоралари ушбу штаблар фаолиятига жалб этилиб, жойлардаги масалаларни ҳал этишга кўмаклашади.
Вилоят, туман ва шаҳар ҳокимлари иқтисодий комплекс билан биргаликда ҳафтада уч кун фақат камбағалликни қисқартириш ва аҳоли бандлигини таъминлаш масалалари билан шуғулланади.
