Ғолиблар 15 миллион сўмгача мукофот билан тақдирланади

6 сентябрь куни Тошкент шаҳрида Tashkent International Half Marathon – 2026 халқаро спорт тадбири бўлиб ўтади.

Мусобақа доирасида иштирокчилар 21,0975 километр масофадаги ярим марафон ҳамда 5 километр масофадаги оммавий югуришда қатнашиши мумкин.

 

Иштирокчилар учун старт пакетида старт рақами, электрон чип, расмий футболка, финишер медали, трассадаги сув ва озиқ-овқат, шунингдек, электрон сертификат ва натижа тақдим этилади.

Иштирок этиш нархи 300 минг сўм этиб белгиланган. 5 километр масофага қатнашувчилар учун махсус акция ҳам мавжуд бўлиб, рўйхатдан ўтиш нархи 10 минг сўмни ташкил этади. Иштирокчи масофани босиб ўтиб, финишга етиб келганидан сўнг 100 минг сўми қайтариб берилади.

Старт пакетлари 5 сентябрь куни Tashkent City Parkда соат 10:00 дан 20:00 гача берилади.

6 сентябрь куни Tashkent City Parkда соат 05:00 да старт шаҳарчаси очилади. 5 километр масофага старт 06:00 да, ярим марафонга старт эса 06:30 да берилади. Тақдирлаш маросими 10:00 га режалаштирилган.

Ярим марафонда эркаклар ва аёллар ўртасида алоҳида ғолиблар аниқланади. 1-ўрин учун 15 миллион, 2-ўрин учун 12 миллион, 3-ўрин учун 10 миллион сўм, 4-ўрин учун 6 миллион, 5-ўрин учун 4 миллион ва 6-ўрин учун 3 миллион сўмдан мукофот берилади.

5 километр масофада эса 1-ўрин соҳибларига 3 миллион, 2-ўрин учун 2 миллион ва 3-ўрин учун 1 миллион сўмдан соврин топширилади. Бу йўналишда ҳам эркаклар ва аёллар алоҳида тақдирланади.

Мусобақани томоша қилиш учун мухлислар учун кириш бепул.

Иштирок этиш учун ProRun.uz сайти ёки @prorunuzbot орқали рўйхатдан ўтиш мумкин.