Сентябрь-декабрь ойларида 350 минг одам доимий иш билан таъминланади
Ҳокимларга йил якунига қадар 230 минг оилани камбағалликдан чиқариш вазифаси юклатилди.
Шавкат Мирзиёев раислигида камбағалликни қисқартириш ва аҳоли даромадларини ошириш бўйича ишларни янги босқичга олиб чиқиш масалаларига бағишланган йиғилишда вилоят ва туман ҳокимлари штаблар фаолиятини самарали ташкил этиб, яратилган янги имкониятлардан тўлиқ фойдаланиши зарурлиги таъкидланди.
Қайд этилишича, сентябрь-декабрь ойларида 350 минг нафар аҳолини доимий иш билан таъминлаш ҳамда яна 1 миллион аҳолининг даромадини ошириш бўйича ҳудудлар раҳбарлари олдига аниқ вазифалар қўйилади.
Шунингдек, йил якунига қадар 230 минг оилани камбағалликдан чиқариш вазифаси белгиланди.
Бунинг учун ҳар бир йўналиш бўйича аниқ механизм ва ҳаракатлар алгоритмини ишлаб чиқиш, маҳалла даражасида масъулларни белгилаш зарурлиги қайд этилди.
Хитой тажрибаси асосида туман ва маҳаллаларда аҳоли билан бевосита ишлайдиган ходимлар учун аниқ кўрсатмалар ишлаб чиқиш топширилди.
Йиғилиш якунида мутасаддилар ва ҳудудлар раҳбарларининг ахборотлари тингланди.
