Янгиҳаёт туманида 10 кун электр бўлмаслиги ростми?
Тошкент шаҳар магистраль электр тармоқлари ижтимоий тармоқларда тарқалган хабарларга муносабат билдирди.
Ижтимоий тармоқларда Янгиҳаёт туманининг айрим ҳудудларида 10 кун давомида электр энергияси бўлмаслиги ҳақида тарқалган хабар юзасидан Тошкент шаҳар магистраль электр тармоқлари расмий муносабат билдирди.
Қайд этилишича, айни вақтда «Ўзгариш» подстанциясида модернизация ва реконструкция ишлари олиб борилмоқда. Ишлар доирасида подстанциядаги Т-2 трансформатори замонавий янги трансформаторга алмаштирилади.
Таъмирлаш ишлари давомида истеъмолчиларни электр энергияси билан таъминлашда узилишларга йўл қўймаслик мақсадида юклама Т-1 трансформаторига ўтказилади.
Шу сабабли режалаштирилган ишлар туфайли истеъмолчиларда 10 кун давомида электр энергияси бўлмаслиги ҳақидаги маълумот ҳақиқатга тўғри келмайди.
Шу билан бирга, юклама миқдори техник жиҳатдан рухсат этилган чегарадан ошиб кетган тақдирда, электр тармоғининг барқарор ва хавфсиз ишлашини таъминлаш мақсадида қисқа муддатли чекловлар жорий этилиши мумкин.
Модернизация ишлари якунлангач, подстанциянинг ишончлилиги ва электр таъминоти барқарорлиги янада оширилиши маълум қилинди.
