Ўзбекистон муфтийси “Фатво соҳасидаги улкан ютуқлари учун” халқаро мукофоти билан тақдирланди
Тақдирлаш маросими Қоҳирада ўтган халқаро конференция очилишида бўлиб ўтган.
Ўзбекистон мусулмонлари идораси раиси, муфтий Шайх Нуриддин Холиқназаровга “Фатво соҳасидаги улкан ютуқлари учун” Имом Қарафий халқаро мукофоти топширилди. Бу ҳақда Ўзбекистон мусулмонлари идораси хабар берди.
Тақдирлаш маросими Миср пойтахти Қоҳирада бўлиб ўтган “Глобал ўзгаришлар шароитида оила ва фатво институтлари” халқаро конференциясининг очилишида ўтказилган. Мазкур конференция Бутун дунё бўйлаб Фатво бошқармалари ва ташкилотлари Бош котибияти томонидан Миср президенти Абдулфаттоҳ ас-Сиси ҳомийлигида ташкил этилган.
Мукофотни Миср бош муфтийси, профессор Назир Муҳаммад Айёд, Миср Вақф ишлари вазири доктор Усама Ал-Азҳарий ҳамда Халқаро Ислом фиқҳи академияси бош котиби доктор Қутб Мустафо Сано топширган.
Тадбирда дунёнинг турли мамлакатларидан 500 дан ортиқ иштирокчи қатнашган. Конференция иштирокчиларига Ўзбекистонда диний таълим соҳасида амалга оширилаётган ислоҳотлар, шунингдек, муфтий Шайх Нуриддин Холиқназаровнинг фаолиятига бағишланган махсус видеофильм намойиш этилган.
Мукофот буюк олим ва фақиҳ Имом Шиҳобуддин ал-Қарафий (1228–1285) номи билан аталган. У фатво бериш амалиётини такомиллаштириш, исломда мўътадиллик тамойилларини тарғиб қилиш, жамоавий ижтиҳодни ривожлантириш ҳамда замонавий масалаларга шариат асосида ечимлар ишлаб чиқишга ҳисса қўшган уламоларга берилади.
Тақдирлаш маросимида Ўзбекистонда диний таълим ва фатво фаолияти йўналишида амалга оширилаётган ишлар, жумладан, Фатво марказининг фаолияти ва мўътадилликни тарғиб қилишга қаратилган ташаббуслар ҳақида ҳам маълумот берилган.
