Жанубий Кореяда 4 нафар ўзбекистонлик террорчилик ташкилотини қўллаб-қувватлашда гумон қилинмоқда
Улар Суриядаги террорчилик ташкилотига пул ва транспорт воситаларини юборишда айбланмоқда.
Жанубий Корея полицияси Сурияда фаолият юритувчи Катиба ал-Тавҳид вал-Жиҳод (КТЖ) террорчилик ташкилотини молиялаштириш ва унга моддий ёрдам кўрсатишда гумон қилинган тўрт нафар Ўзбекистон фуқаросига нисбатан тергов олиб бормоқда. Бу ҳақда Yonhap хабар берди.
Маълум қилинишича, гумонланувчилардан бири 2025 йил апрель ойидан бошлаб КТЖга жами 6,3 миллион вон (тахминан 4,6 минг доллар) миқдорида криптовалюта юборганликда гумон қилинмоқда.
Шунингдек, у гуруҳдан криптовалюта олгани ва ушбу маблағлар ҳисобидан умумий қиймати 170 миллион вон бўлган 11 та фойдаланилган автомобиль ҳамда 2 та экскаватор харид қилиб, уларни Сурияга юборган бўлиши мумкин.
Полиция қолган уч нафар Ўзбекистон фуқаросини эса асосий гумондорга ёрдам бериш, жумладан, фойдаланилган транспорт воситаларини топишда кўмаклашишда айбланмоқда. Улар ҳибсга олинмаган ҳолда сўроқ қилинган.
Тергов маълумотларига кўра, асосий гумондор Ўзбекистон фуқароларидан бирининг номи остида фойдаланилган автомобиллар экспорти билан шуғулланувчи компанияни бошқарган.
БМТ 2022 йилда Ал-Қоида билан алоқадор КТЖни террорчилик ташкилоти сифатида белгилаган.
Ҳозирда Жанубий Корея ҳуқуқни муҳофаза қилувчи органлари томонидан тергов ҳаракатлари давом эттирилмоқда.
