Фарғона ва Наманганда гиёҳвандлик воситаларининг ноқонуний айланмаси фош этилди
Тезкор тадбирлар давомида жами 1,2 килограммдан ортиқ “гашиш” ҳамда 782 дона “Тропикамид” аниқланган.
Давлат хавфсизлик хизмати Фарғона ва Наманган вилоятлари бўйича бошқармалари томонидан Ички ишлар ва Божхона органлари билан ҳамкорликда гиёҳвандлик воситаларининг ноқонуний айланмасига қарши тезкор тадбирлар ўтказилди.
Хусусан, Қўқон шаҳрида ўтказилган тадбирлар давомида муқаддам судланган 44 ёшли фуқаронинг яшаш хонадони кўздан кечирилганда, ертўласидан 782 дона «Тропикамид» кучли таъсир қилувчи дори воситаси аниқланган.
Яна бир ҳолатда фуқаронинг хонадонидан 758 грамм «гашиш», гиёҳвандлик воситалари қолдиқлари бўлган 6 дона пичоқ ҳамда 4 дона электрон тарози ашёвий далил сифатида олинган.
Наманган вилоятида эса «Фарғона–Наманган» йўналишида ҳаракатланаётган «Lasetti» автомобили Наманган тумани ҳудудида тўхтатилиб, кўздан кечирилган. Автомобиль салонидан 465 грамм «гашиш» моддаси аниқланган.
Мазкур ҳолатлар юзасидан жиноят ишлари қўзғатилиб, ҳозирда тергов ҳаракатлари олиб борилмоқда.
