Тошкентда янги замонавий санъат маркази очилади
1912 йилда қурилган собиқ трамвай депоси ва дизель электр станцияси негизида CCA Tashkent ташкил этилди.
2026 йил 6 сентябрь куни Тошкент шаҳрида Тошкент замонавий санъат маркази — CCA Tashkent ўз фаолиятини бошлайди.
Янги маданий макон бир асрдан ортиқ тарихга эга бўлган иншоот негизида ташкил этилган. 1912 йилда меъмор Вилгелм Гейнзелман лойиҳаси асосида қурилган бино дастлаб трамвай депоси, кейинчалик дизель электр станцияси сифатида фойдаланилган.
Бугунги кунда тарихий иншоотнинг меъморий қиёфаси ва индустриал руҳини сақлаб қолган ҳолда, у замонавий санъат, таълим, тадқиқот ва маданий мулоқот марказига айлантирилди.
Лойиҳа давлат раҳбари ташаббуси билан амалга оширилган. Марказнинг архитектура концепцияси Франциянинг Studio KO бюроси томонидан ишлаб чиқилган бўлиб, унда тарихий мерос ва замонавий инфратузилма уйғунлаштирилган.
CCA Tashkent таркибида кўргазма заллари, таълим ва жамоат майдонлари, кутубхона ҳамда тадқиқот инфратузилмаси фаолият юритади.
Марказда замонавий санъат кўргазмалари билан бир қаторда маърузалар, кинонамойишлар, илмий-тадқиқот лойиҳалари, мунозаралар, концертлар, перформанслар ва бошқа маданий-таълим тадбирларини ўтказиш режалаштирилган.
Янги марказ Тошкентнинг маданий ҳаётини бойитиш, замонавий санъат ва ижодий мулоқот учун янги имкониятлар яратишга хизмат қилиши кутилмоқда.
