Андижон ва Фарғонада гиёҳвандлик воситаларининг ноқонуний айланмаси фош этилди
Икки ҳолатда жами 470 грамм “гашиш” ва 482 грамм кўкнори ашёвий далил сифатида олинган.
Андижонда гиёҳвандлик воситаларининг ноқонуний айланмасига чек қўйилди. Бу ҳақда ДХХ хабар берди.
ДХХ Чегара қўшинлари ва Андижон вилояти бўйича бошқармаси ҳамда вилоят Ички ишлар бошқармаси ходимлари ҳамкорлигида Булоқбоши тумани ҳудудида ҳаракатланаётган «Нехиа» русумли автомобиль тўхтатилиб, холислар иштирокида кўздан кечирилганда, автомобилда йўловчи сифатида кетаётган 1978 ва 1985 йилларда туғилган икки нафар фуқаронинг ёнидан 470 грамм «гашиш» гиёҳвандлик воситаси аниқланган. Терговга қадар текширувда мазкур модда қўшни давлатдан контрабанда йўли билан олиб кирилгани маълум бўлган.
Фарғона вилоятида ўтказилган бошқа тезкор тадбирда эса Фарғона туманида яшовчи, 1968 йилда туғилган фуқаронинг хонадони холислар иштирокида кўздан кечирилган.
Натижада ушбу манзилдан қуритилган ҳолда сақланаётган 482 грамм кўкнори гиёҳвандлик воситаси аниқланиб, ашёвий далил сифатида расмийлаштириб олинган.
Ҳозирда ҳар икки ҳолат юзасидан тегишли шахсларга нисбатан жиноят ишлари қўзғатилиб, тергов ҳаракатлари олиб борилмоқда.
