Андижонда кредит қарзи сабаб 19 млрдлик бино хатланди
Ҳозирда хатланган мол-мулкларни электрон онлайн-аукцион савдосига чиқариш чоралари кўрилмоқда.
Тадбиркорлик фаолиятини ривожлантириш мақсадида тижорат банкларидан олинган кредитлар ўз вақтида тўланмаган ҳолларда, қарздорликни қоплаш учун гаровга қўйилган мулкка нисбатан мажбурий чоралар қўлланилади.
Мажбурий ижро бюроси Андижон вилояти бошқармаси иш юритувида бўлган суд ҳужжатларига мувофиқ, қарздор масъулияти чекланган жамият ҳисобидан ундирувчи АТБ “Микрокредитбанк” фойдасига жами 19,4 миллиард сўм миқдоридаги кредит қарзи ундирилиши белгиланган.
Суд ҳужжатига асосан ундирувни гаровдаги жавобгарга тегишли бўлган дори воситалари ишлаб чиқариш цехи бино ва иншоотларига қаратиш белгиланган.
Бюронинг вилоят бошқармаси ходимлари томонидан ижро ҳаракатлари амалга оширилиб, қарздорга суд ҳужжатида белгиланган мажбуриятларни ихтиёрий равишда бажариши учун имконият берилган бўлса-да, қарздорлик белгиланган муддатда бартараф этилмаган.
Ижро жараёни давомида бошланғич баҳоси 19 миллиард сўм бўлган дори воситалари ишлаб чиқариш цехи хатланди.
Ҳозирда хатланган мол-мулкларни электрон онлайн-аукцион савдосига чиқариш чоралари кўрилмоқда.
