Тиббиёт ва фармацевтика ходимларини давлат рўйхатидан ўтказиш тизими жорий этилади

 
Ўзбекистонда 2027 йил 1 июлдан тиббиёт ва фармацевтика ходимларини халқаро стандартларга мувофиқ давлат рўйхатидан ўтказиш тизими жорий этилади. Мутахассисларнинг касбий малакаси Тиббиёт ва фармацевтика ходимларининг малакасини баҳолаш маркази томонидан мустақил ва шаффофлик принциплари асосида баҳоланади.

 
2030 йилгача давлат рўйхатидан ўтиш ихтиёрий бўлиб, махсус имтиҳон орқали ёки малака тоифаси берилиши жараёнида автоматик тарзда амалга оширилади. Рўйхатдан ўтган ходимга 5 йил муддатга тегишли мақом берилади.

 
Аввал берилган малака тоифалари ҳам амал қилиш муддати тугагунига қадар сақланади. Улар асосида белгиланган устамалар ва лавозим билан боғлиқ ҳуқуқлар ҳам ўз кучида қолади.

 
2030 йилдан кейин имтиҳондан ўта олмаган ходим ишидан четлатилмайди. Унга бир йил ичида қайта имтиҳон топшириш имконияти берилади ва шу даврда фаолиятини давом эттириши мумкин.

 
Уч йил ёки ундан кўпроқ вақт давомида ишламаган тиббиёт ва фармацевтика ходимлари учун ҳам алоҳида тартиб белгиланади. Улар ихтисослашув курсларини тамомлаб, қайта давлат рўйхатидан ўтиши мумкин. Агар аввалги рўйхатдан ўтиш муддати тугамаган бўлса, қайта имтиҳон топшириш талаб этилмайди.

 
Камида 20 йиллик иш стажига эга ва илмий даражаси бўлган шифокорлар эса имтиҳонсиз давлат рўйхатидан ўтказилади. Шу тариқа уларнинг узоқ йиллик касбий тажрибаси ва илмий салоҳияти ҳисобга олинади.

 
Янги тизим доирасида тиббиёт ва фармацевтика ходимларининг малакасини баҳолаш жараёни халқаро стандартлар асосида модернизация қилиниши белгиланган.