“Бир-бирини қутқармоқчи бўлишган”

Тошкент вилояти Бўстонлиқ туманидаги Чорвоқ сув омборида 2 сентябрь куни чўкиб кетган ота ва унинг икки ўғлини қидириш ишлари давом этмоқда. Фавқулодда вазиятлар вазирлиги 6 сентябрь куни қидирув ишлари ҳали якунланмаганини маълум қилди.

 

Вазирлик маълумотига кўра, ҳодиса жойида қутқарувчилар ва ғаввослардан иборат катта гуруҳ ишламоқда. Қидирув ишлари сутка давомида узлуксиз олиб борилмоқда.

 

Дастлабки маълумотларга кўра, бир оила Чорвоқ сув омборида катерда сайр қилган. Улар чўмилиш тақиқланган ҳудудда суратга тушиш учун тўхтаган ва кейинчалик чўмилишга қарор қилган.

 

Қутқарув отряди командири Рустам Бўриевнинг айтишича, чўмилиш вақтида оила аъзолари қутқарув жилетларидан фойдаланмаган. Сувда шамол ва тўлқин бўлган пайтда биринчи бўлиб сувга тушган ўғилнинг оёғи тортишиб қолган. Уни қутқариш учун отаси, кейин эса иккинчи ўғли сувга тушган. Натижада учаласи ҳам чўкиб кетган.

 

Катерни бошқараётган ҳайдовчи фуқароларни жилетсиз чўмилмаслик ҳақида огоҳлантирган. Бироқ улар тавсияга амал қилмаган.

 

Ҳодиса вақтида катерда эркакнинг турмуш ўртоғи ва синглиси ҳам бўлган. Аёллар ёрдам сўраган. Катер ҳайдовчиси ҳам сувга тушиб, уларни қутқаришга уринган, бироқ уч кишини қутқаришнинг имкони бўлмаган.

 

“Ҳозирги вақтда бешта қутқарув отряди жалб қилинган. Сувда еттита қутқарув бригадаси қидирув-қутқарув ишларини амалга оширмоқда. Вазиримизнинг топшириғига асосан, Сирдарё ва Жиззах вилоятларидан қутқарув отрядлари жалб қилинган. Кўриб турганимиздек, махсус штаб ташкил қилинган. Барча вазирлик раҳбарияти, қўшимча ҳамкор хизматлар қидирув ишларини амалга ошириляпти. Худо хоҳласа, тез фурсатларда шу чўккан фуқароларни топишга эришамиз”, дейди қутқарувчи.