Бўстонлиқда “Чиқиндисиз табиат” экологик акцияси ўтказилди
Акция давомида “Ёшлар оромгоҳи” ҳудуди ва унга туташ табиий масканлар чиқиндилардан тозаланди.
Тошкент вилояти Бўстонлиқ туманидаги “Ёшлар оромгоҳи” ҳудудида «Эко-оромгоҳ» дастури доирасида “Чиқиндисиз табиат” шиори остида экологик акция ташкил этилди.
Унда республикамизнинг турли ҳудудларидан ташриф буюрган ёш экологлар, эко-фаоллар ҳамда табиатга бефарқ бўлмаган ёшлар фаол иштирок этди.
Акция давомида оромгоҳ ҳудуди ва унга туташ табиий масканлар чиқиндилардан тозаланди. Иштирокчилар томонидан маиший чиқиндилар йиғилиб, белгиланган тартибда сараланди ва ҳудуддан олиб чиқилди.
Тадбирнинг асосий мақсади — ёшлар ўртасида экологик маданиятни юксалтириш, табиатга масъулиятли муносабатни шакллантириш, чиқиндиларни белгиланган жойларга ташлаш ҳамда атроф-муҳитни асраш бўйича жамоатчилик фаоллигини оширишдан иборат.
Акция давомида ёш экологлар ўзаро тажриба алмашиб, табиатни муҳофаза қилиш, чиқиндиларни камайтириш ва экологик тоза муҳит яратиш борасидаги ташаббусларини намойиш этдилар.
“Чиқиндисиз табиат” каби экологик акциялар ёш авлоднинг табиатга бўлган меҳрини кучайтириш, экологик масъулиятини ошириш ва соғлом атроф-муҳитни асрашга қаратилган амалий ташаббусларни кенгайтиришда муҳим аҳамият касб этади.
Рашида Норбоева тайёрлади
