“Бунёдкор” стадиони қарздорлик туфайли электр тармоғидан узиб қўйилди
Электр йўқлиги сабаб ЎзПФЛ офиси масофадан ишлашга ўтган, Лига серверлари эса фаолиятини тўхтатган.
“Бунёдкор” стадионида электр энергияси учун юзага келган қарздорлик туфайли 4 сентябрь куни соат 11:00 атрофида электр таъминоти тўлиқ узиб қўйилди.
Мазкур ҳолат стадион ҳудудида фаолият юритаётган ташкилотлар ишига ҳам таъсир кўрсатган. Хусусан, Ўзбекистон Профессионал Футбол Лигаси (ЎзПФЛ) офиси вақтинча масофадан ишлаш режимига ўтган.
Лига маълумотига кўра, электр таъминотидаги узилиш серверларнинг тўлиқ фаолиятдан тўхташига сабаб бўлган. Натижада Суперлига ва Пролига учрашувларининг трансляция жараёнида айрим техник қийинчиликлар юзага келган.
Маълум қилинишича, расмий учрашувлар давомида Лига трансляция сигналларини қабул қилиб, уларни марказлаштирилган тартибда турли платформалар орқали қайта узатади. Стадиондаги электр таъминоти билан боғлиқ муаммо сабаб ҳозирда учрашувлар сигналларини қайта узатишда ташқи серверлардан фойдаланилмоқда.
Электр таъминотидаги узилиш “Бунёдкор” клуби, стадион маъмурияти, логистика компаниялари ва бошқа ижарачилар фаолиятига ҳам таъсир кўрсатгани қайд этилган.
ЎзПФЛ Лига билан боғлиқ масалалар юзасидан мурожаат қилувчи ташкилотлар ва жисмоний шахслардан мурожаатларни info@pfl.uz электрон почта манзилига юборишни сўраган.
Электр таъминоти қачон тўлиқ тикланиши бўйича ҳозирча аниқ муддат маълум қилинмаган.
