“Экооромгоҳ–2026” дастурига старт берилди
Дастурнинг асосий мақсади ёш авлодда экологик маданиятни шакллантириш, атроф-муҳитни асрашга оид билимларини мустаҳкамлаш, табиатга масъулиятли муносабатни кенг тарғиб қилишдан иборат.
Тошкент вилоятининг Бўстонлиқ туманида Экология вазирлиги ташаббуси билан ёшларнинг экологик билим ва кўникмаларини ошириш, уларнинг табиатни муҳофаза қилиш борасидаги фаоллигини қўллаб-қувватлашга қаратилган «Экооромгоҳ–2026» дастурига старт берилди.
Дастур доирасида Ўзбекистоннинг турли ҳудудларидан ташриф буюрган ёш экологлар, эко-фаоллар ва табиатга бефарқ бўлмаган ёшлар иштирок этмоқда.
«Экооромгоҳ–2026»нинг асосий мақсади — ёш авлодда экологик маданиятни шакллантириш, атроф-муҳитни асрашга оид билимларини мустаҳкамлаш, табиатга масъулиятли муносабатни кенг тарғиб қилиш ҳамда ёш экологларнинг ташаббусларини қўллаб-қувватлашдан иборат.
Дастур давомида иштирокчилар учун экологик тарғибот тадбирлари, амалий машғулотлар, семинар ва тренинглар, табиатни муҳофаза қилишга қаратилган акциялар ҳамда турли интерактив лойиҳалар ташкил этилиши кўзда тутилган.
Шунингдек, ёш экологларнинг жамоавий ташаббусларини ривожлантириш, ўзаро тажриба алмашиш ва экологик муаммоларга инновацион ечимлар топишига алоҳида эътибор қаратилади.
Дастур доирасида ўтказилган илк тадбирлардан бири сифатида “Чиқиндисиз табиат” экологик акцияси ташкил этилиб, унда турли вилоятлардан келган ёш экологлар фаол иштирок этди.
«Экооромгоҳ–2026» дастури ёшларни табиатни асраш йўлида бирлаштириш, уларнинг экологик ташаббусларини рўёбга чиқариш ва экологик маданиятни юксалтиришга хизмат қилади.
Рашида Норбоева тайёрлади
