Энди Тошкентдан Паркентга 50 дақиқада етиб борасиз
Паркент–Тошкент йўналишида янги электропоезд қатнови йўлга қўйилди.
7 сентябрь куни «Паркент – Тошкент – Паркент» йўналишида замонавий шаҳарлараро электропоезд қатнови йўлга қўйилди.
Мазкур лойиҳа Ўзбекистон Президентининг 2025 йил 27 январдаги ПҚ-28-сон қарори асосида амалга оширилди. Лойиҳа доирасида Тошкент вилоятидаги «Байтқўрғон – Паркент» йўналишининг 24 километрлик электрлаштирилган темир йўл линияси барпо этилди.
Шунингдек, лойиҳа доирасида 3 та темир-бетон кўприк, автомобиль йўл ўтказгичи, 76 та сув ўтказиш иншооти, 16 та автомобиль ва темир йўл кесишмаси ҳамда 50 ўринли «Паркент» темир йўл бекати қурилган.
Янги электропоезд 586 та ўриндиққа эга бўлиб, жами 1 154 нафаргача йўловчини ташиш имкониятига эга. Паркентдан Тошкентгача бўлган сафар вақти 50 дақиқани ташкил этади.
Йўлкира нархи катталар учун 10 минг сўм, 10 ёшгача бўлган болалар учун эса 6,5 минг сўм этиб белгиланган
Янги транспорт қатнови Паркент тумани аҳолиси учун Тошкент билан транспорт алоқаларини яхшилаш, йўловчилар учун қулай ва тезкор ҳаракатланиш имкониятини яратишга хизмат қилади.
Шунингдек, замонавий темир йўл инфратузилмасининг ишга туширилиши Паркентнинг туристик салоҳиятини ривожлантириш, ҳудудга сайёҳлар оқимини ошириш ҳамда янги иш ўринлари яратишга қўшимча имконият яратиши кутилмоқда.
