Германиядан Ўзбекистонга почта орқали 4 кг наркотик модда юборилди
Черногория фуқароси почта жўнатмасини қабул қилиб олаётган вақтда ушланган.
«Хавфсиз ва соғлом юрт» тезкор-профилактик тадбирлари доирасида Давлат хавфсизлик хизмати ва Божхона қўмитаси ходимларининг ҳамкорликдаги тадбири давомида гиёҳвандлик воситалари контрабандасининг олди олинди.
Тезкор тадбир давомида Тошкент шаҳрининг Яккасарой туманида вақтинча истиқомат қилаётган, 2001 йилда туғилган Черногория фуқароси Германиядан юборилган почта жўнатмасини қабул қилиб олаётган вақтда холислар иштирокида тўхтатилган.
Жўнатма белгиланган тартибда текширилганда, спорт анжомлари орасига яширилган 3 килограмм «Клефедрон» ва 1 килограмм «гашиш» гиёҳвандлик воситалари борлиги аниқланган. Мазкур моддалар ашёвий далил сифатида расмийлаштириб олинган.
Тезкор тадбирлар давом эттирилиб, хорижий фуқаронинг вақтинча яшаш хонадони ҳам кўздан кечирилган. Натижада у ердан умумий оғирлиги 30 грамм бўлган «Альфа-ПВП» наркотик моддасидан тайёрланган 11 дона «закладка», шунингдек, зип-пакетлар, электрон тарози ва бошқа буюмлар аниқланган.
Мазкур ҳолат юзасидан хорижий фуқарога нисбатан жиноят иши қўзғатилган. Ҳозирда тергов ҳаракатлари олиб борилмоқда.
