Сирдарёда ободонлаштириш бошқармаси масъуллари 1 млрд сўмни талон-торож қилди
Улар амалда ишламаган фуқароларга иш ҳақи ҳисоблаб, бюджет маблағларини ўзлаштирган.
Бош прокуратура ҳузуридаги Департаментнинг Сирдарё вилояти бошқармаси томонидан ўтказилган терговга қадар текширувда Гулистон шаҳар ободонлаштириш бошқармаси масъул шахсларининг бюджет маблағларини талон-торож қилгани аниқланди.
Текширувда масъул шахслар айрим фуқароларни ишчи сифатида расмийлаштириб, амалда ишламаган ушбу фуқароларга 1 млрд сўм миқдорида иш ҳақи ҳисоблагани маълум бўлган.
Аниқланган маълумотларга кўра, ҳисобланган маблағлар масъуллар томонидан ўз эҳтиёжлари учун сарфланган.
Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят иши қўзғатилиб, ҳозирда тергов ҳаракатлари олиб борилмоқда.
