Тошкентда интернет-наркомагазинида "закладчик" бўлиб ишлаган талабалар ушланди
Тезкор тадбирларда 14 нафар шахс қўлга олиниб, улардан 2,5 кг альфа-ПВП процессуал тартибда мусодара қилинди.
Тошкент шаҳрининг бир қатор туманларида ўтказилган тезкор тадбирлар давомида интернет орқали наркотик моддалар савдоси билан шуғулланган 14 нафар шахс қўлга олинди. Улар орасида икки нафар олий таълим муассасаси талабаси ҳам борлиги аниқланган.
Ички ишлар вазирлиги Тезкор-қидирув департаменти ва унинг ҳудудий бўлинмалари Давлат хавфсизлик хизмати, Божхона қўмитаси ҳамда хорижий давлатларнинг ҳуқуқни муҳофаза қилувчи органлари билан ҳамкорликда Чилонзор, Юнусобод, Янгиҳаёт, Бектемир ва бошқа туманларда тезкор тадбирлар ўтказган.
Тадбирлар давомида 2005 йилда туғилган олий таълим муассасасининг 3-босқич талабаси интернет-наркомагазинда наркотик моддаларни яширин жойларга жойлаштириб кетувчи шахс сифатида фаолият юритгани аниқланган. Янгиҳаёт туманида унинг бошқарувидаги автомобиль текширилганда, салонга яширилган 500 грамм альфа-ПВП топилган.
Шунингдек, Мирзо Улуғбек туманида 2007 йилда туғилган 2-босқич талабаси ҳам қўлга олинган. Унинг ёнидан болалар сепмаси кўринишида яширилган 263 грамм альфа-ПВП аниқланган. Кейинги текширувларда унинг ҳам интернет-наркомагазин билан боғлиқ фаолият юритгани маълум бўлган.
Янгиҳаёт туманида яна уч нафар шахс қўлга олиниб, улар интернет-наркомагазин куратори томонидан юборилган локациялар асосида яширин жойлардан наркотик моддаларни олиб кетгани аниқланган.
Тезкор тадбирларнинг халқаро йўналиши доирасида жиноий ташкилот раҳбарларидан бири хорижий давлат ҳудудида яшириниб юргани аниқланиб, ўша давлат ҳуқуқни муҳофаза қилувчи органлари томонидан қўлга олинган.
Жами 14 нафар шахс трансмиллий жиноий ташкилотда турли вазифаларни бажаргани аниқланган. Улардан процессуал тартибда 2 килограмм 500 грамм альфа-ПВП мусодара қилинган. Мазкур миқдор 71 минг 433 истеъмол дозасига тенг экани қайд этилган.
Ҳолат юзасидан барча гумонланувчиларга нисбатан Жиноят кодексининг 273-моддаси 6-қисми билан жиноят ишлари қўзғатилган. Уларга нисбатан қамоққа олиш тарзидаги эҳтиёт чораси қўлланган.
