Жиззахда қидирувдаги машиналарга рейд бошланди
МИБ ҳамда ЙҲХБ ҳамкорлигида қарздорлик ва қидирувда бўлган автотранспорт воситаларини аниқлашга қаратилган рейд тадбирлари олиб борилмоқда.
МИБнинг Жиззах вилояти бошқармаси қидирув ходимлари ҳамда Йўл ҳаракати хавфсизлиги бошқармаси ходимлари билан ҳамкорликда қарздорлик ва қидирувда бўлган автотранспорт воситаларини аниқлашга қаратилган рейд тадбирлари олиб борилмоқда.
Тадбирлар давомида ижро ҳужжатлари бўйича қарздорлиги мавжуд фуқароларга тегишли бўлган, шунингдек, турли сабабларга кўра қидирувга берилган автомашиналарни аниқлаш ва белгиланган тартибда тегишли чоралар кўришга алоҳида эътибор қаратилмоқда.
Қидирув ходимлари ва ЙҲХБ ходимларининг ўзаро ҳамкорлиги натижасида транспорт воситаларини аниқлаш, уларнинг ҳаракатланиш йўналишларини назорат қилиш ҳамда ижро ҳужжатлари талабларини таъминлаш бўйича амалий ишлар кучайтирилмоқда.
Қарздорликни яшириш ёки мажбуриятдан бўйин товлаш ижро жараёнини тўхтатмайди. Қонунчиликда белгиланган тартибда қарздорликни ундириш ва ижро ҳужжатларини таъминлаш бўйича зарур чоралар кўрилади.
Фуқароларга мавжуд қарздорликларини ўз вақтида бартараф этиш, автотранспорт воситаларига нисбатан қидирув ёки бошқа чекловлар мавжуд ёки мавжуд эмаслигини олдиндан текшириб олиш тавсия этилади.
