Алифбо ўзгаради: сенаторлар қонун лойиҳасини маъқуллади
Янги тартибга кўра, алифбо амалдаги 26 та ҳарф ва 3 та ҳарф бирикмаси ўрнига 28 та ҳарф ва битта апострофдан иборат бўлади.
Олий Мажлис Сенатининг 19-ялпи мажлисида “Лотин ёзувига асосланган ўзбек алифбосини жорий этиш тўғрисида”ги қонунга ўзгартиришлар киритиш ҳақидаги қонун муҳокама қилинди.
Мажлисда сўнгги йилларда ўзбек тилини ривожлантириш, унинг давлат тили сифатидаги мақомини мустаҳкамлаш ҳамда халқаро нуфузини ошириш борасида тизимли ишлар амалга оширилаётгани таъкидланди.
Қонун билан лотин ёзувига асосланган ўзбек алифбосини такомиллаштириш назарда тутилган. Унга кўра, амалдаги 26 та ҳарф ва 3 та ҳарф бирикмаси ўрнига 28 та ҳарф ва битта апострофдан иборат алифбо белгиланади.
Шунингдек, янги алифбога ўтиш даврида фуқаролар ва ташкилотларнинг ҳуқуқ ҳамда манфаатларини ҳисобга олиш мақсадида айрим ҳужжатлар, миллий валюта ва қимматли қоғозларнинг амалдаги алифбода расмийлаштирилган шакллари Қонун кучга киргунга қадар муомалада бўлишига имкон берилади.
Давлат идоралари ва ташкилотларининг айрим рамзий белгилари, шунингдек, турли белгилар ҳам улардан фойдаланишга яроқсиз ҳолга келгунга ёки белгиланган амал қилиш муддати тугагунга қадар ишлатилиши мумкин.
Сенаторларнинг таъкидлашича, қонуннинг қабул қилиниши лотин ёзувига асосланган ўзбек алифбоси ва имло қоидаларини такомиллаштириш, давлат тилидан фойдаланиш имкониятларини кенгайтириш ҳамда ўзбек тилини рақамлаштириш жараёнларини ривожлантиришга хизмат қилади.
Муҳокамалар якунида қонун сенаторлар томонидан маъқулланди.
