“Бу ердан инсон ўз тарихини янада чуқурроқ англаган ҳолда чиқади” — Озод Солиев

 

АҚШда фаолият юритаётган Vatan Global Alliance жамияти раиси Озод Солиев Ўзбекистондаги Ислом цивилизацияси марказига ташриф буюрди.

 

Ташриф давомида меҳмон Марказнинг экспозиция залларида намойиш этилаётган тарихий ва маданий мерос намуналари билан яқиндан танишди. Унга Ўзбекистон ҳудудида шаклланган қадимий цивилизациялар, ислом маданияти ва маърифати, илм-фан тараққиёти, буюк алломалар ҳаёти ва илмий мероси, шунингдек, халқимизнинг кўп асрлик тарихини акс эттирувчи ноёб экспонатлар ҳақида батафсил маълумот берилди.

 

Озод Солиев Марказ ҳақида аввал оммавий ахборот воситалари орқали маълумотга эга бўлганини, бироқ уни бевосита кўздан кечириш жараёнида мажмуанинг кўлами ва мазмун-моҳиятини янада чуқурроқ ҳис қилганини таъкидлади.

 

“Мен бу Марказ ҳақида аввал эшитган ва янгиликларда кўрган эдим. Лекин унинг бундай кенг қамровли эканлигини тасаввур ҳам қилмаган эканман. Инсон бу ерда тарихимиз қанчалик бой ва чуқур эканини ҳис қилади. Биринчи Ренессансдан бошлаб бугунги кунгача бўлган тараққиёт босқичларини бир маконда яхлит тарзда намойиш этиш — жуда катта меҳнат натижаси”, — деди у.

 

Меҳмон Марказда ҳар бир экспонатнинг тарихи, келиб чиқиши ва ўрганилиш жараёни ҳақида маълумот берилгани ташриф буюрувчиларга тарихий жараёнларни янада чуқурроқ англаш имконини яратишини қайд этди.

 

“Ҳар бир экспонатнинг ўз тарихи бор. Қаердан олиб келингани, қачон топилгани ва қандай аҳамиятга эга экани ҳақида маълумотлар берилган. Бундай масканга кирган инсон бу ердан шунчаки чиқиб кетмайди. У ўз тарихини, ислом цивилизацияси ва юртимиз ўтмишини янада чуқурроқ англаган ҳолда чиқади”, — деди Озод Солиев.

 

Унинг таъкидлашича, Ислом цивилизацияси маркази нафақат Ўзбекистон фуқаролари, балки хорижий меҳмонлар учун ҳам мамлакатимизнинг бой тарихий-маданий мероси билан яқиндан танишиш имконини берувчи муҳим маърифий маскан ҳисобланади.

 

Ташриф давомида Марказнинг қисқа муддатда барпо этилгани, экспозицияларни яратишда замонавий ёндашувлардан фойдаланилгани, тарихий меросни асраш, илмий ўрганиш ва кенг жамоатчиликка етказишга қаратилган ишлар ҳам меҳмоннинг эътиборини тортди.

 

Озод Солиев Марказнинг халқаро миқёсда эътироф этилаётганини, жумладан, унинг Гиннес рекордлар китобига киритилганини мажмуанинг ўзига хос кўлами ва аҳамиятини ифодаловчи муҳим кўрсаткич сифатида баҳолади.

 

Шунингдек, у Ўзбекистонда тарихий-маданий меросни асраб-авайлаш, уни илмий тадқиқ этиш ва халқаро жамоатчиликка кенг тарғиб қилишга қаратилаётган эътибор муҳим амалий натижалар бераётганини таъкидлади.

 

Vatan Global Alliance жамияти доирасида АҚШда яшаётган ватандошларни бирлаштириш, улар билан ҳамкорликда турли ташаббус ва лойиҳаларни амалга ошириш бўйича ишлар олиб борилаётгани ҳам қайд этилди.

 

Ташриф якунида Озод Солиев Марказда яратилган шароит ва экспозициялардан олган таассуротлари билан ўртоқлашиб, бундай маскан Ўзбекистоннинг бой тарихий ва маданий меросини дунёга кенг намоён этишда муҳим аҳамият касб этишини билдирди.