Эрон билан можаро 2029 йилгача чўзилиши мумкин — WSJ
Mожаро 2029 йил январида АҚШнинг навбатдаги президенти лавозимига киришганидан кейин ҳам давом этиши мумкин.
АҚШ маъмуриятининг юқори лавозимли вакиллари Эрон билан давом этаётган можаро Дональд Трампнинг президентлик муддати якунлангунига қадар ҳал этилмаслиги мумкинлигини билдирган. Бу ҳақда The Wall Street Journal ўз манбаларига таяниб хабар берди.
Нашр манбаларига кўра, АҚШ вице-президенти Жей Ди Вэнс, Давлат котиби Марко Рубио ва бошқа юқори мартабали амалдорлар Оқ уйдаги учрашувлар давомида Трампга Эрон ҳарбий ҳаракатлар ва блокадага қарамай, Вашингтон босимига қаршилик кўрсатишда давом этиши мумкинлигини айтган.
Бундай сценарийда можаро 2029 йил январь ойида АҚШнинг навбатдаги президенти лавозимига киришганидан кейин ҳам давом этиши мумкин. WSJ таъкидлашича, Вэнс ва Рубио Республикачилар партиясидан келгуси президентлик сайловларида эҳтимолий номзодлар сифатида кўрилмоқда.
Нашрга кўра, можаронинг узоқ давом этиши АҚШ ҳарбий ресурсларига тушадиган юкни ошириши, шунингдек, 2028 йилги президентлик сайловлари даврида глобал энергия бозорларида узоқ муддатли узилишларга сабаб бўлиши мумкин.
Шу билан бирга, Трамп маслаҳатчиларига можарони имкон қадар тезроқ якунлашдан манфаатдор эканини мунтазам равишда билдирмоқда. WSJ маълумотларига кўра, можаро аллақачон еттинчи ойга кирган ва 18 нафар америкалик ҳарбий хизматчининг ўлимига сабаб бўлган.
Бироқ АҚШ президенти Эронни узоқ муддат иқтисодий босим остида ушлаб туриш стратегиясини ҳам қўллаб-қувватламоқда. Бу ёндашув денгиз блокадаси ва санкцияларни ўз ичига олиши мумкин.
