Йўлкира ҳақини тўламаган 4 696 нафар йўловчига баённома расмийлаштирилди
Тошкентда сентябрь ойининг дастлабки саккиз кунида йўлкира ҳақини тўламаган 4 696 нафар йўловчига нисбатан маъмурий баённомалар расмийлаштирилди. Бу август ойидаги кунлик ўртача кўрсаткичдан қарийб 68 фоизга кўп.
2026 йил 1 сентябрдан бошлаб брутто-шартнома асосида фаолият юритаётган барча шаҳар автобусларида йўлкира ҳақини тўлашнинг янги тартиби жорий этилди. Унга кўра, йўловчи автобусга чиқиши билан йўлкира ҳақини тўлаши шарт.
Шу муносабат билан «Тошкент шаҳар йўловчи ташишни мониторинг ва назорат қилиш» давлат муассасаси назоратчилари томонидан жамоат транспортида йўлкира ҳақини тўлаш тартибига риоя этилишини таъминлаш мақсадида кучайтирилган назорат рейдлари ўтказилмоқда.
Маълумотларга кўра, август ойида йўлкира ҳақини тўламасдан ҳаракатланган 10 843 нафар йўловчига нисбатан Маъмурий жавобгарлик тўғрисидаги кодекснинг 144-моддаси 5-қисмига асосан маъмурий баённомалар расмийлаштирилган. Бу кунига ўртача 350 та ҳолатни ташкил этган.
Сентябрь ойининг дастлабки саккиз кунида эса 4 696 нафар йўловчига нисбатан маъмурий баённомалар тузилган. Мазкур даврда кунига ўртача 587 та ҳолат қайд этилган.
Шундай қилиб, сентябрь ойининг дастлабки саккиз кунида кунига ўртача расмийлаштирилган маъмурий баённомалар сони август ойидаги кўрсаткичга нисбатан 237 тага ёки қарийб 68 фоизга ошган.
