Нақд пулда 176 млн сўмгача тўлов қилиш мумкин бўлади
Янги тартиб билан товар ва хизматлар учун нақд ҳисоб-китоб қилишнинг амалдаги 25 млн сўмлик чегараси сезиларли даражада кенгайтирилади.
Президентнинг ПФ-175-сон фармони билан тадбиркорлар ва истеъмолчилар учун нақд ҳисоб-китоблар бўйича янги тартиб белгиланмоқда.
Унга кўра, товар ва хизматлар учун нақд шаклда амалга ошириладиган ҳисоб-китобларнинг энг юқори миқдори БҲМнинг 400 баравари, яъни 176 млн сўм этиб белгиланади. Янги тартиб амалдаги чегарани қарийб етти бараварга оширади.
Бунда қонунчиликка кўра, тўловлари фақат нақд пулсиз шаклда амалга оширилиши белгиланган товар ва хизматларга мазкур қоида татбиқ этилмайди.
Жумладан, давлат органлари томонидан кўрсатиладиган хизматлар, электр энергияси, табиий газ ва ичимлик суви учун айрим тўловлар, алкоголь ва тамаки маҳсулотлари, ёқилғи қуйиш шохобчаларида нефть-газ маҳсулотларини сотиш ҳамда электр транспорт воситаларини зарядлаш хизматларида нақд пулсиз ҳисоб-китоб талаби сақланиб қолади.
Шунингдек, кўчмас мулк, ишлаб чиқарилганига 10 йилдан ошмаган айрим тоифадаги транспорт воситалари ва махсус автотранспорт воситаларини сотиб олишда ҳам тўловлар нақд пулсиз амалга оширилади.
Қишлоқ хўжалиги маҳсулотларини сотиб олишда эса қийматидан қатъи назар, нақд ҳисоб-китоб қилиш мумкин.
