2 200 доллар эвазига “Умра”: фирма вакиллари қўлга тушди
Фарғона ва Наманганда фуқароларни ноқонуний равишда “Умра” зиёратига юборишни ваъда қилиб, пул талаб қилган сайёҳлик фирмаси вакиллари қўлга олинди.
Ҳуқуқни муҳофаза қилувчи органлар томонидан фуқароларни тегишли лицензиясиз “Умра” зиёратига юбориш билан боғлиқ ноқонуний ҳолатларнинг олдини олиш бўйича тезкор тадбирлар ўтказилмоқда.
Жумладан, Фарғона вилоятининг Қўқон шаҳрида фаолият юритувчи сайёҳлик фирмаси раҳбари икки нафар фуқарони “Умра” зиёратига юборишни ваъда қилиб, бунинг эвазига 2 200 АҚШ доллари талаб қилгани аниқланган.
Давлат хавфсизлик хизмати ҳамда ички ишлар органлари ходимлари ҳамкорлигида ўтказилган тезкор тадбир давомида фирма раҳбари сўралган пул маблағини олаётган вақтида ашёвий далиллар билан ушланган.
Шунингдек, Наманган вилоятининг Чортоқ туманида фаолият юритувчи сайёҳлик фирмаси ходими ҳам икки нафар фуқарони “Умра” сафарига юборишни ваъда қилиб, 2 200 АҚШ доллари талаб қилгани маълум бўлган. У олдиндан 400 АҚШ долларини олган вақтида ДХХ ва ИИБ ходимлари томонидан ушланган.
Мазкур ҳолатлар юзасидан тегишли шахсларга нисбатан жиноят ишлари қўзғатилиб, ҳозирда тергов ҳаракатлари олиб борилмоқда.
