625 граммлик «юк»: уч ҳолат фош этилди

 

Биринчи ҳолатда Давлат хавфсизлик хизматининг Хоразм вилояти бўйича бошқармаси, вилоят Ички ишлар ҳамда Божхона бошқармалари ходимлари ҳамкорлигида Тупроққалъа туманида тезкор тадбир ўтказилган.

 

Тадбир давомида “Сурхондарё – Хоразм” йўналишида ҳаракатланаётган «Lasetti» русумли автомобиль тўхтатилиб, текширилганда йўловчи сифатида кетаётган, Ангор туманида яшовчи, 1960 йилда туғилган, муқаддам гиёҳвандлик воситалари билан боғлиқ жинояти учун икки маротаба судланган шахсга тегишли целлофан пакетдан 490 грамм «опий» моддаси аниқланган.

 

Дастлабки маълумотларга кўра, мазкур гиёҳвандлик воситаси қўшни давлатдан контрабанда йўли билан олиб кирилиб, Хоразм вилоятида сотилиши режалаштирилган.

 

Иккинчи ҳолатда “Тошкент – Хоразм” йўналишида ҳаракатланаётган «Оnix» русумли автомобиль йўловчиси — Урганч шаҳрида яшовчи, 1968 йилда туғилган шахснинг ёнидан 119 грамм «гашиш» моддаси топилиб, ашёвий далил сифатида олинган.

 

Учинчи ҳолат ДХХ Жиззах вилояти бўйича бошқармаси ҳамда вилоят ИИБ ходимлари ҳамкорлигида Сирдарё вилоятининг Оқолтин туманида ўтказилган тезкор тадбир давомида аниқланган.

 

“Сирдарё – Жиззах” йўналишида ҳаракатланаётган «Lasetti» русумли автомобиль тўхтатилиб, ҳайдовчи — Жиззах шаҳрида яшовчи, 1974 йилда туғилган, муқаддам гиёҳвандлик воситалари билан боғлиқ жинояти учун судланган шахс текширилган.

 

Текширув вақтида унинг оёқ кийими ичига 16 грамм «опий» моддаси яширилгани аниқланиб, ашёвий далил сифатида олиб қўйилган.

 

Мазкур ҳолатлар юзасидан тегишли шахсларга нисбатан жиноят ишлари қўзғатилган. Ҳозирда дастлабки тергов ҳаракатлари олиб борилмоқда.