“75 мактуб” иши: Ташиевга қўйилган айблов ўзгартирилди

 

Бишкек шаҳар суди “75 мактуб” иши бўйича судланувчиларга нисбатан чиқарилган ҳукмни ўзгартирди. Жумладан, Қирғизистон Миллий хавфсизлик давлат қўмитасининг собиқ раиси Қамчибек Ташиевга қўйилган “ҳокимиятни куч билан эгаллаш” айблови олиб ташланиб, унинг ўрнига “сайлов ҳуқуқларини амалга оширишга тўсқинлик қилиш” моддаси қўлланди.

 

10-центабр куни Бишкек шаҳар судида иш бўйича ҳукм эълон қилинди. Суд барча судланувчиларни 4 йилга озодликдан маҳрум қилишга ҳукм қилган, бироқ уларга 2 йил муддатга пробация назоратини белгилаган. Шу сабабли улар қамоққа олинмайди.

 

Суд, шунингдек, янги қўлланган модда бўйича мол-мулкни мусодара қилиш жазоси назарда тутилмаганини қайд этган.

 

Аввалроқ, 2 июль куни Бишкекнинг Первомайский туман суди “75 мактуб” иши бўйича ҳукм чиқарган эди. Ўшанда Қамчибек Ташиев, парламентнинг собиқ раиси Нурланбек Турғунбек ва собиқ депутат Курманкул Зулушев “ҳокимиятни куч билан эгаллаб олиш” моддаси бўйича айбдор деб топилиб, 4 йилга озодликдан маҳрум қилинган ва уларга 3 йиллик пробация назорати белгиланган.

 

Иш бўйича бошқа судланувчилар ҳам 4 йилга озодликдан маҳрум қилинган, бироқ уларга нисбатан шартли жазо қўлланган.

 

7-центабр куни бўлиб ўтган суд мажлисида прокурорлар барча судланувчиларга 9 йилгача озодликдан маҳрум қилиш жазоси тайинлашни сўраган эди.

 

Мазкур иш 9 февраль куни 75 нафар собиқ бош вазир, парламент собиқ аъзолари, сиёсатчилар ва жамоат арбоблари томонидан президент Садир Жапаров ҳамда ўша пайтдаги парламент спикери Нурланбек Турғунбекка муддатидан олдин президентлик сайловларини ўтказиш таклифи билан мурожаат қилингани ортидан юзага келган.

 

Кейинчалик мурожаатга қўшилган айрим шахслар унинг мазмунини ўқимасдан имзо қўйганини билдирган.

 

10 февраль куни Садир Жапаров Қамчибек Ташиевни Вазирлар Маҳкамаси раиси ўринбосари ва Миллий хавфсизлик давлат қўмитаси раиси лавозимларидан озод қилган эди.