Эрон баллистик ракеталар ишлаб чиқаришни қайта бошлагани айтилмоқда — WSJ

Эрон АҚШ ва Исроилнинг ҳарбий зарбалари ортидан баллистик ракеталар ишлаб чиқаришни қайта тиклаган бўлиши мумкин. Бу ҳақда АҚШ ва Яқин Шарқ расмийларига таянган ҳолда «The Wall Street Journal» хабар берди.

Нашр маълумотларига кўра, Эрон ерости иншоотларида захирада сақланган қисмлардан суюқ ва қаттиқ ёқилғили баллистик ракеталарни йиғиш билан шуғулланмоқда. Разведка маълумотларида мамлакатдаги бир нечта ерости объектларида, жумладан, жануби-шарқда жойлашган Хожир ракета мажмуасида фаоллик кузатилаётгани қайд этилган.

Расмийларнинг айтишича, Теҳрон келгусида янги зарбаларга дуч келмаслик учун қўшимча ерости йиғиш объектларини барпо этишга ҳам уринмоқда.

Нашрга кўра, ракета ишлаб чиқаришнинг қайта тикланиши Эроннинг ракета дастурини тўлиқ йўқ қилиш қанчалик қийин эканини кўрсатади.

АҚШ расмийларидан бирининг айтишича, Эронда мавжуд қисмлардан камида бир неча юзта ракета йиғиш имконияти бўлиши мумкин. Шу билан бирга, мамлакат уруш давомида тайёр ракета захираларининг бир қисмини сарфлагани сабабли ҳужумлар кўлами қисқарган.

AҚШ расмийлари Эроннинг ракета ва дрон ишлаб чиқариш имкониятлари сезиларли даражада заифлаштирилганини билдирган. Бироқ экспертлар Теҳроннинг ракета дастури ҳали ҳам катта салоҳиятга эга эканини таъкидламоқда.

Жумладан, АҚШдаги Missile Defense Advocacy Alliance ташкилоти таҳлилчиси Тал Инбарнинг фикрича, зарбалар тўхтаган пайтда шикастланган инфратузилмани тиклаш ва зарур қисмларни тўплаш имкони мавжуд.

Исроил бош вазири идораси ва Оқ уй вакиллари «The Wall Street Journal»нинг Эрон ракета ишлаб чиқаришни қайта бошлагани ҳақидаги сўровига жавоб бермаган.

Айни пайтда Эрон Яқин Шарқдаги АҚШ базаларига ракета ҳужумларини давом эттираётгани хабар қилинмоқда. Бу эса мамлакатда турли хил баллистик ракеталарни ишлаб чиқариш ва қўллаш салоҳияти сақланиб қолаётганини кўрсатиши мумкин.