Президент Шавкат Мирзиёев “ТоshTech” техника университети фаолияти билан танишди
Университетда илк 400 талаба 100 фоиз давлат гранти асосида таълим олмоқда.
Президент Шавкат Мирзиёев Олмазор туманига ташрифи давомида “ТоshTech” техника университети фаолияти билан танишди.
Университет давлат раҳбарининг 2025 йил 8 сентябрдаги тегишли қарори асосида ташкил этилган бўлиб, олий муҳандислик таълимини трансформация қилишга қаратилган. Лойиҳанинг умумий қиймати 69,5 миллиард сўмни ташкил этади.
Ушбу маблағ ҳисобидан Тошкент давлат техника университетининг етти қаватли ўқув биноси тўлиқ реконструкция қилиниб, замонавий лаборатория ва ўқув жиҳозлари билан таъминланган.
“ТоshTech” академик, молиявий ва ташкилий-бошқарув жиҳатдан мустақил давлат олий таълим муассасаси ҳисобланади. Режага кўра, 2030 йилгача Тошкент давлат техника университетининг тегишли факультет ва кафедралари босқичма-босқич янги инновацион экотизимга трансформация қилинади.
Университетга 2026/2027-ўқув йили учун 1 654 нафар абитуриент ҳужжат топширган. Уларнинг орасидан энг билимли ва иқтидорли 400 нафари сараланиб, ўқишга қабул қилинган. Илк талабаларининг барчаси 100 фоиз давлат гранти асосида таълим олмоқда. Мазкур имтиёз 2029/2030-ўқув йилига қадар қабул қилинадиган талабалар учун ҳам сақланади.
Университетда таълим тўлиқ инглиз тилида олиб борилади. Дарсларга маҳаллий олимлар билан бирга хорижлик юқори малакали мутахассислар ҳам жалб этилган.
Талабалар тўртта асосий йўналишда — саноат муҳандислиги ва менежмент, электр муҳандислиги, энергетика муҳандислиги, материалшунослик ва нанотехнологиялар бўйича таҳсил олади.
“ТоshTech” халқаро таълим брендлари билан ҳамкорликда ташкил этилган. Университет Шанхай Цзяо Тонг университети (Хитой), Милан политехника университети (Италия), Бремен конструктор университети (Германия) ҳамда “Bоston Consulting Group” компанияси билан ҳамкорлик қилмоқда.
Университетда назарий билим билан чекланиб қолмасдан, талабаларни дастлабки курсларданоқ реал саноат лойиҳалари ва мураккаб муҳандислик муаммолари устида ишлашга ўргатиш мақсад қилинган. Шу сабабли талабалар ўқиш давридаёқ амалиёт ўташи ва келгусида иш билан таъминланиши учун мамлакатимиз ҳамда хорижий саноат компаниялари билан ҳамкорлик йўлга қўйилган.
Жумладан, “ТоshTech” “АCWА”, “UzAuto Motors”, “Иссиқлик электр станциялари” ва “Ҳудудий электр тармоқлари” каби йирик компаниялар билан ҳамкорлик қилади.
Ташриф давомида Президентга университетнинг келгуси режалари ҳақида маълумот берилди. Давлат раҳбари ўқитувчи ва талабалар билан мулоқотда “ТоshTech” мамлакат саноат салоҳиятини янги босқичга олиб чиқадиган муҳандисларнинг янги авлодини тайёрлайдиган инновацион масканга айланиши кераклигини таъкидлади.
Президент Шавкат Мирзиёев билим ва тажриба инсон учун энг ишончли сармоя эканини қайд этди.
“Инсоннинг мол-мулки, мавқейи ёки бошқа моддий бойликлари вақтинчалик бўлиши ёки йўқолиши мумкин, аммо унинг онгидаги, қалбидаги билим ва тажрибани ҳеч ким ва ҳеч қандай куч тортиб ололмайди. Билим инсоннинг энг хавфсиз ва энг фойдали сармоясидир”, — деди давлат раҳбари.
Ташриф якунида Президент университет талабалари билан суратга тушди.
