Рейсингиз кечикдими? Энди сизга компенсация тўланиши мумкин
Рақобат қўмитасига ҳаво транспорти хизматлари бўйича мурожаатлар сони йилнинг биринчи ярмида 4,1 бараварга ошган.
Рақобат қўмитаси маҳаллий авиакомпаниялар айби билан рейслар кечиккан ҳолатларда йўловчиларга компенсация тўланиши ва истеъмолчилар ҳуқуқларига риоя этилишини ўрганмоқда.
Қўмита маълумотига кўра, 2026 йилнинг биринчи ярмида ҳаво транспорти хизматлари бўйича истеъмолчилардан 300 дан ортиқ мурожаат келиб тушган. Бу ўтган йилнинг мос даврига нисбатан 4,1 баравар кўп.
Мурожаатларда рейсларнинг бир неча соатга кечикиши, йўловчиларга ўз вақтида аниқ маълумот берилмаслиги, хизматларнинг сифатсиз кўрсатилиши ҳамда амалда тақдим этилмаган хизматлар учун ҳақ олиниши каби ҳолатлар қайд этилган.
Қўмита ўтказган таҳлилларга кўра, айрим ҳолларда ташувчининг айби билан кечиккан рейслар бўйича йўловчиларга компенсация ёки муқобил ечим таклиф қилинмаган. Бундай ҳолатлар фуқароларнинг вақти, маблағи ва режалари бузилишига олиб келаётгани қайд этилган.
Ҳозирда қўмита маҳаллий авиакомпанияларнинг ташувчининг айби билан кечиккан рейслар учун йўловчиларга компенсация тўлаши ҳамда истеъмолчилар ҳуқуқларига риоя этиши билан боғлиқ ҳолатларни очиқ манбалар асосида ўрганмоқда.
Қўмита авиакомпаниялардан рақамли платформаларидаги маълумотларни тўлиқ тақдим этиш ва уларни амалдаги қонунчиликка мувофиқлаштиришни сўраган. Фуқароларга эса ушбу соҳадаги таклиф ва эътирозларини Рақобат қўмитасига юбориш тавсия этилган.
