Россияда мигрантларга янги талаб: ишламайдиган оила аъзоси ҳам солиқ тўлайди
Тегишли тартиб 2027 йил 1 январдан кучга киради.
2027 йил 1 январдан Россияда ишлаётган хорижий фуқаролар мамлакатда яшаётган ҳар бир ишламайдиган оила аъзоси учун солиқ тўлаши белгиланди. Бу ҳақда Россия Ички ишлар вазирлиги вазирининг биринчи ўринбосари, Фуқаролик ва хорижий фуқароларни рўйхатга олиш хизмати раҳбари Андрей Кикот маълум қилди.
Унинг сўзларига кўра, мазкур чора Россиянинг давлат миграция сиёсати доирасида мигрантларнинг ишламайдиган оила аъзоларининг мамлакатда қолишини чеклашга қаратилган.
Кикотнинг қайд этишича, мигрант болаларни Россия мактабларига қабул қилиш бўйича жорий этилган талаблар натижасида мамлакатда яшаётган ишламайдиган оила аъзолари сони 1,7 миллиондан қарийб 20 фоизга камайган.
Шунингдек, Россияда хорижий ишчиларни мақсадли ва уюшган тарзда ёллаш тизимини жорий этиш режалаштирилмоқда. Тегишли қонун лойиҳаси айни пайтда ҳукумат томонидан кўриб чиқилмоқда.
Янги тизимга кўра, иш берувчи миграция хизматига хорижий ишчи кучига эҳтиёж бўйича ариза беради. Шундан сўнг махсус оператор ишчиларни танлаб, уларни Россияга олиб келади. Меҳнат шартномаси муддати тугагач, мигрант ўз ватанига қайтарилиши кўзда тутилган.
Йирик ва ўрта бизнес вакиллари эса бундай ишчиларни турар жой ҳамда иш жойига етиб бориш учун транспорт билан таъминлаши шарт бўлади.
Маълумот учун, 2026 йил июнь ойида Россия Президенти Владимир Путин миграция соҳасидаги давлат божларини оширишни назарда тутувчи қонунни маъқуллаган.
2025 йил баҳорида Россия Ички ишлар вазирлиги Миграция масалалари бош бошқармаси таркибида Андрей Кикот раҳбарлигида хорижий фуқаролар билан боғлиқ масалалар бўйича алоҳида хизмат ташкил этилган.
