5 млрд сўмгача кредит гаровсиз берилади: кимлар фойдалана олади?
Ижтимоий реестрдаги оилаларни кооперацияга жалб қилган тадбиркорларга туман ва шаҳар штаблари қарори асосида гаровсиз кредит ажратилади.
11 сентябрь куни “Барқарор иш ўринларини яратиш ва кичик бизнесни жадал ривожлантириш орқали аҳоли даромадларини ошириш чора-тадбирлари тўғрисида”ги Президент фармони (ПФ–193-сон) қабул қилинди.
Фармонга кўра, Ижтимоий реестрга киритилган оилаларни кооперацияга жалб қилган лидер тадбиркорларга туман ёки шаҳар штаби қарори асосида 5 млрд сўмгача гаров таъминотисиз кредит ажратилишига рухсат берилади.
Бунда жалб қилинган ҳар бир оила учун 50 млн сўмгача кредит ажратилади.
Шунингдек, оилавий тадбиркорликни ривожлантириш ва ёшлар тадбиркорлиги дастурлари доирасидаги имтиёзли кредит ресурсларини бошқариш ваколати туман ва шаҳар штабларига ўтказилади.
2026 йил 1 октябрдан ўзини ўзи банд қилган шахслар ҳамда кичик ва ўрта тадбиркорлик субъектларига тижорат банклари кредитлари бўйича фоиз харажатларининг бир қисмини компенсация қилиш механизми ҳам жорий этилади.
Бунда компенсация бериш бўйича қарорни туман ва шаҳар штаблари маҳаллий шароит, лойиҳанинг самарадорлиги ва устувор йўналишлардан келиб чиқиб қабул қилади.
Компенсация ажратишда кредит тарихи, тадбиркорнинг тоифаси, барқарорлик рейтинги ва бошқа талабларни жорий этишга йўл қўйилмайди.
Тадбиркорлик субъектларининг белгиланган умумий тартибда “Тадбиркорликни ривожлантириш компанияси” АЖга компенсация олиш учун бевосита мурожаат қилиш ҳуқуқи ҳам сақлаб қолинади.
