“Ғамхўрлик” марказидаги икки ўлим: Агентлик тиббий ҳужжатларни очиқлади
“Ғамхўрлик” марказида икки боланинг вафоти ортидан тиббий хизмат сифатига доир саволлар пайдо бўлди. Ижтимоий ҳимоя миллий агентлиги ҳолатни ўрганиб, болаларнинг сўнгги кунларидаги тиббий жараёнлар бўйича маълумот берди.
Ижтимоий тармоқларда Тошкент шаҳридаги «Ғамхўрлик» марказларида ногиронлиги бўлган болаларга тиббий хизмат кўрсатиш билан боғлиқ муаммолар, жумладан, 2-сон «Ғамхўрлик» марказида икки нафар боланинг вафоти ҳақида мурожаат эълон қилинди.
Мазкур мурожаат Ижтимоий ҳимоя миллий агентлиги томонидан ўрганилиб, мавжуд тиббий ҳужжатлар таҳлил қилинган.
Агентлик маълумотига кўра, мурожаатда икки боланинг вафоти уларнинг соғлиғи етарли даражада назорат қилинмагани билан боғлиқ экани ҳақида фикр билдирилган.
Ўрганиш давомида 2007 йилда туғилган бола 2026 йил 11 июнь куни ўткир жарроҳлик касаллиги белгилари билан шифохонага ётқизилгани аниқланган. У 9 кун давомида даволанган ва 20 июнь куни вафот этган.
2016 йилда туғилган иккинчи бола эса узоқ вақт давомида сурункали ўпка касаллиги бўйича даволанган. 25 июль куни касаллиги зўрайгани сабабли шифохонага юборилган ва тиббиёт муассасасида вафот этган.
Мазкур ҳолатлар қайд этилган даврда 2-сон «Ғамхўрлик» марказида 14 нафар шифокор ва 28 нафар ҳамшира фаолият юритган. Шифокорлар штатини оптималлаштириш жараёни 2026 йил 25 августда якунланган. Айни пайтда марказда шифокорлар учун 2 та штат бирлиги, ҳамширалар учун эса 30,5 та штат бирлиги мавжуд.
Тиббиёт ходимлари болаларнинг соғлиғи ҳолатини мунтазам кузатиш, зарур ҳолларда бирламчи тиббий ёрдам кўрсатиш ҳамда уларни тиббиёт муассасаларига ўз вақтида йўналтириш учун масъул ҳисобланади.
Агентлик томонидан доимий парваришга муҳтож болаларда соғлиқ ҳолатидаги ўзгаришларни ўз вақтида аниқлаш ва зарур ёрдамни кўрсатиш муҳимлиги қайд этилди.
Таъкидланишича, «Ғамхўрлик» марказларида парвариш ва тиббий хизматлар сифатини янада ошириш масаласи доимий назоратда бўлади.
