Болага зўравонлик қилишнинг баҳоси: 1 йиллик таъқиқ

11 сентябрь куни ЎРҚ–1174-сонли қонун билан айрим қонун ҳужжатларига ўзгартириш ва қўшимчалар киритилди.

Қонунга кўра, таълим ташкилотида вояга етмаган болаларни тарбиялаш ва уларга таълим бериш мажбурияти юклатилган шахс томонидан тарбия ва таълим жараёнида болага нисбатан жисмоний зўравонлик содир этиш, шунингдек, уни камситиш ёки хўрлаш каби ҳаракатлар учун маъмурий жавобгарлик белгиланади.

Бундай ҳуқуқбузарлик учун фуқароларга БҲМнинг 1 бараваридан 5 бараваригача миқдорда жарима солиниши мумкин.

Шунингдек, педагогик фаолият давомида вояга етмаганларга нисбатан жисмоний ёки руҳий зўравонлик билан боғлиқ ҳуқуқбузарлик содир этгани учун маъмурий жавобгарликка тортилган шахсларнинг 1 йил давомида айрим таълим ташкилотларида педагогик фаолият билан шуғулланишига йўл қўйилмайди.

Мазкур чеклов мактабгача таълим, умумий ўрта ва ўрта махсус таълим, профессионал таълим ҳамда болалар учун қўшимча таълим ташкилотларига нисбатан қўлланади.

Бундан ташқари, давлат ёки нодавлат муассасаларининг тўлиқ таъминотида бўлган вояга етмаган болага алимент тўлаши шарт бўлган ота ёки онани алимент тўлашдан озод қилишга йўл қўйилмаслиги белгиланди.

Ота-она қарамоғидан маҳрум бўлган бола фойдасига ундириладиган алимент миқдорини камайтириш бўйича ишлар кўриб чиқилганда «Инсон» ижтимоий хизматлар марказлари ҳам жалб этилади.

Қонун расмий эълон қилинган кундан эътиборан кучга киради.