Дарс ўрнига жанжал: текширув бошланди
Қаршидаги мактабда ўқувчилар жанжали юзасидан суриштирув бошланди.
Қарши шаҳридаги 1-сонли умумий ўрта таълим мактабида ўқувчилар ўртасида жанжал юз берди. Ҳолат акс этган видео ижтимоий тармоқларда тарқалди.
Қашқадарё вилояти Мактабгача ва мактаб таълими бошқармаси маълумотига кўра, дастлабки ўрганишлар давомида видеодаги воқеа иштирокчилари аниқланган.
Ҳуқуқни муҳофаза қилувчи органлар томонидан ўқувчилар ва уларнинг ота-оналаридан тушунтиришлар олинган. Шунингдек, жанжалнинг келиб чиқиш сабаблари ҳамда иштирокчилар ўртасидаги муносабатлар ўрганилган.
Ҳолатга ҳуқуқий баҳо бериш учун тегишли ҳужжатлар Қарши шаҳар ИИБга юборилган. Ҳозирда ваколатли органлар томонидан суриштирув ишлари олиб борилмоқда.
Суриштирув якунлари асосида ҳолатга қонунчиликда белгиланган тартибда ҳуқуқий баҳо берилади. Ўрганиш жараёни вилоят Мактабгача ва мактаб таълими бошқармаси томонидан назоратга олинган.
