“Мажлис ўтказмадим”: Каттахонова дам олиш кунидаги қабулга изоҳ берди
Унинг айтишича, жараёнга ҳудудлардаги ходимлар жалб қилинмаган.
Ижтимоий тармоқларда Бош вазир ўринбосари, Оила ва хотин-қизлар қўмитаси раиси Дилноза Каттахонова якшанба куни мажлис ўтказгани ҳақида хабарлар тарқалди. Ҳолат жамоатчиликда турли муносабатларга сабаб бўлди.
Айрим фойдаланувчилар дам олиш кунида давлат идоралари ходимларини ишга жалб қилишни танқид қилиб, буни «мажлисбозлик» деб баҳолади.
Каттахонова эса ўзининг ижтимоий тармоқдаги саҳифасида тарқалган хабарларга изоҳ берди.
«Бу масалага яна бир бор аниқлик киритиб қўймоқчиман. Биринчидан, мен мажлис ўтказмадим. Шахсий қабул қилишимни сўраган фуқароларнинг мурожаатларини Zoom орқали ўргандим.
Иккинчидан, қабул якшанба куни эмас, ҳафта бошидаги 5 кунлик дам олиш кунлари давомида фуқароларни узоқ куттирмаслик мақсадида ташкил этилди. Жараёнга ҳудудлардаги ходимлар жалб қилинмади.
Учинчидан, мен давлат хизматчиларининг дам олиш кунларини, айниқса якшанбани, ўз оиласи бағрида ўтказиши тарафдориман», — дея ёзади Бош вазир ўринбосари.
